投資一周：問貼士怎拆招 - 周顯
■筆者在個多月前曾推介家夢控股，多日後才開始入貨。
星期一那天，同金融界的朋友Thomas在國福樓吃午飯，由於他在先前買進了21控股(1003)和中銅資源(476)，賺了不少，於是死要問我攞最新的股票貼士。我心想：「上年叫你攞住三幾千萬蚊，畀我揸弗去投資，你條友阿之阿左摩洛哥，幾千萬蚊變咗爛尾。家陣見我有咁多followers，又嚟問貼士，咁易就範我咪好冇面？」(按：「咁我咪好冇面」是上世紀九十年代的流行語，一講這句話，就能知道講者的年齡。)
於是我就詐儍扮懵：「文化中國(1060)都炒爆曬啲散戶啦，仲邊有咁多貼士？」
吃方魚肉碎粥有好地方
回頭我就忘記了這件事，去了一次小便，之後回到座位，打了一個電話給我的經紀：「唔該幫我入10萬股家夢控股(8101)。」Thomas聽到了這句話，馬上追問：「這股票是不是有料到？」
我愕了一愕，想不到一時疏忽，即時穿崩，心想：「呢隻股票我仲未買夠貨，點講得畀你聽呀？唔通我同你講，近日我密密收集，揸到成手都係咩。」定一定神，終於找到了說辭：「朋友叫我買，唔知得唔得㗎。」
其實，家夢控股這隻股票，我早在一個多月之前，曾經在別報介紹過，我仲係介紹完好多日之後，先至開始入貨，直情係守規矩到爆，我都唔相信自己竟然咁老實。
那天去吃潮州菜，朋友叫了一窩方魚肉碎粥，我一口也沒有吃。朋友好奇，問我為何不吃，我說：「我從來只吃九龍城黃明記的蠔仔肉碎粥加十蚊方魚，其他潮州餐廳的肉碎粥，一概不吃。」
吃完了黃明記之後，還可以到它旁邊的廚房用品專門店去看，其中最吸引眼球的，是一具製雞蛋仔機，售價280元，還有一具高級版，賣兩千多元，我好想買，不過看了幾次都捨不得。
周顯
投資者、八卦公、知識分子
mailto:phemey@gmail.com
本欄逢周三刊出
上一則: 青心直說：狂人永冇益人 - 胡孟青
下一則: Prof J財技特訓班：追蹤龍虎三王 - 徐燦傑
投資一周 - 周顯 舊文
