中環在線：陳啟宗諗計朝電商發展 - 李華華
■恒隆在內地專開高檔商場，陳啟宗就話生意暫時冇受網購影響。
阿里巴巴旗下淘寶令網購越來越火紅，唔少內地商場、百貨都要諗計或者搵人合作，將實體零售與網購結合，拓展O2O(Online to Offline)經營模式。恒隆地產(101)主席陳啟宗雖然一邊話網購唔會取代商場，但原來都開始諗計，朝住O2O方向發展。
陳啟宗喺最新年報嘅「致股東函」，花咗啲篇幅討論網購趨勢。佢指，電商(電子商貿)正迅速成為一種生活模式，情況好似100年前電話，或者十年前智能手機出現一樣，雖然方便咗，但人與人之間仍要實地交往，汽車或飛機都冇被取代。同一道理，網購唔會取代商場。
標準化同商品類產品，如電子用品同平價衣履容易被網購取代；但陳啟宗堅持話，高檔時裝、餐廳等受到嘅影響較細，甚至冇影響。
佢當然要咁講啦，恒隆專開高檔商場，點都要話旗下商場冇受網購影響㗎，等於地產商成日話買樓自住幾時都啱，樓價升跌都係5%、10%，唔通叫人唔好買樓，倒自己米咩！
內地同業紛搶攻O2O
事實上，唔少內地百貨、商場已經搵人合作搞O2O，銀泰(1833)與茂業(848)舊年分別搵阿里旗下天貓與騰訊(700)合作，客人網上落單，喺門市攞貨，金鷹(3308)早前亦承認，電商令生意下跌，要搶攻O2O。
陳啟宗冇直接話要做O2O，但就整個EST計劃，意指經驗、服務、科技，執行時卻倒轉次序，咁咪即係科技行先囉。聽聞，恒隆內部諗緊整個App，透過App吸引人去商場消費，未必一定搵人合作。其實，乜嘢名堂都好，結合電商真係大勢所趨。
李華華
mailto:LiWaWa@AppleDaily.com
上一則: 招金短債107億急升逾倍
下一則: 中環在線：跑怡廈籌款壞蛋掌門人鬼馬 - 李華華
中環在線 - 李華華 舊文
