貶人仔托經濟
2014年03月24日
上個星期末段有兩大事故，先有美國聯儲局將加息預期，由明年末提早到明年春，再有上周五內地股市反彈，要重新評估宏觀新形勢。
美國利息政策左右全球投資大局。聯儲局主席耶倫，新官上任三把火，除了繼續每次議息會議削減100億美元買債規模，估計在今年內完全終結量化寬鬆(QE)政策外，又提早了加息預期，話明年春季或會開始加息。睇耶倫的態度，對美國經濟前景比較樂觀，利息周期向上似乎不可逆轉。
美國貨幣政策大變，全世界將受影響。先睇睇美股，美國加息預期提前，息差將拉闊，銀行股最受惠，消息出街後美國銀行股連升兩日，跑贏大市。當中摩根大通全個星期漲5.1%；大摩升4.5%；富國亦漲3.2%。與銀行股相反，以收息為主的房地產投資信託基金(REITs)，在加息的情況下，回報無以前咁吸引，股價受壓，Healthcare REIT、General Growth及Equity Residential累跌超過1%。
新興市場 加息承壓
美國銀行股走強，點解香港銀行股卻腳軟軟呢？匯控(005) 上周五只係升0.8%，跑輸恒指的1.2%升幅。渣打(2888) 仲衰，上周五只係升0.07%，根本唔想升，上周五收152.2元，比剛創的52周低位151.5元相差不遠，睇圖係彈都唔彈嗰隻。
銀行股跑得咁慢，主要原因係美國投資者唔睇好新興市場，匯控和渣打都係有新興市場業務的銀行(特別係渣打)，所以無投資者吼。新興市場無運行同美國收水兼加息有關，美國收水減低全球資金流動性，利息上升會令美元轉強，資金從新興市場回流到美國，新興經濟將會好傷，當中有龐大貿易赤字及缺乏結構性改革的新興國家，就更加大鑊，印度、巴西、土耳其、泰國就屬於呢類高危國家，中國有貿易盈餘和正推行經濟改革，已經唔係最衰嗰隻。
匯控近期走勢雖然好過內銀，但整體走勢都係橫行中微微向下，成為弱股，完全跟唔到同佢同級數的美國銀行股走勢。唔好以為人哋升先，佢遲啲跟，其實「萬種行情歸於市」，市價就已經反映咗投資者的睇法，人升佢無乜得升，已反映咗佢無力。好似另一隻重磅股中移動(941) 已成弱股，佢盈利首次出現倒退，被多家大行調低目標價，上周五逆市跌3.7%，為跌幅最大藍籌股，呢啲股份又屬於有反彈、無升幅那一類。另外，股市唔好嘅時候，本來買REITs有高息收，可以抗跌，在美國加息預期下，美國的REITs都乏力，亦將壓抑中港REITs的升幅。
內地股市跌得多，阿爺就出招，中國證監會上周五就優先股及創業板規定頒佈新例，推升內地股市，帶動香港的紅色股反彈。上周五早上已廣泛流傳內地將容許企業發行優先股，內地股市炒起，上證綜指收復2000點大關，全日收報2047點，升2.7%；推動本港上市的中資股向上，國企指數全日收報9427點，升224點，升2.3%，比恒指的1.2%升幅高。
推優先股 國貨反彈
市場憧憬內銀股將可率先發行優先股集資，既可改善資本結構，也有助減輕在股市發普通股集資的壓力，11隻內銀全線上升，成為升市火車頭，建行(939) 升1.6%；工行(1398) 升2.1%；招行(3968) 升3.1%。
紅色股跌咗咁耐，內銀穿晒底，都係時候反彈一下。阿爺上周見上證綜指穿咗2000點，朝向1949點的所謂「建國底」(中國建國年份)進發，都有啲擔心，就出優先股呢啲招數嚟托市，可以預計，若然股市再跌，阿爺仍然有其他招數會出。
家無人睇好阿爺經濟，高盛在上周四將中國今年經濟增長預測，由7.6%調低到7.3%。呢幾年中國股市跌市，基本上係反映「美國放水，中國收水」對經濟的負面影響。又唔好以為到美國收水，中國就可放水，怕只怕美國利息升，中國經濟再放慢，令本來已經弱的中國經濟更弱。阿爺唔會「繞埋雙手唔做嘢」，會作出應變，唔會任由經濟滑落去。你睇佢出「優先股」呢一招，就知阿爺連股市都救，無理由經濟唔救，我同內地經濟界高人傾過，聽講阿爺有兩招可以托經濟：一係壓低人民幣匯率；二係減息。第一招已經開始做緊，睇人民幣呢兩個月兌港幣的匯率已經跌超過2%，就知道阿爺做緊嘢。
人仔跌幅 大過預期
本來，外界以為阿爺上周一開始將人民幣匯價每日波幅由1%升至2%，只係將人民幣匯價有序開放的長期措施而已，但擴大波幅以後，阿爺無托住人民幣的匯價，人仔跌幅比想像中大一些。人民幣正在陰陰跌之中，陸羽仁一問之下發覺，阿爺正有計劃地讓人民幣貶值，藉此刺激出口，托高經濟。
陸羽仁嘗試探問內地高人口氣，問佢人民幣究竟會回落幾多呢？他們都諱莫如深，更令人相信其實阿爺有部署而為，但不想披露底細。雖然一般估計阿爺唔希望人民幣跌得好多，以免投資者對人民幣長線失去信心，阻礙國際化進程。但我認為阿爺會認為短期壓低人民幣無乜壞，出招時會以出口的回升及經濟狀況做參考，出口唔升，經濟唔彈，不排除阿爺會讓人民幣跌得再深少少。讓人民幣貶值，好明顯係支持經濟的一種手段。
有人即時反應係，人民幣貶值，美國佬肯唔肯呀？人民幣由2004年(1美元兌8.277人民幣)開始升值，最新報6.22人民幣，即係兌港紙由100港元兌106.6元人民幣，升到80.2元，十年間升值近25%。期間與美國10年期國債收益率向下走，同美元走弱的步調差唔多。美國利率好低，美國經濟又差，美元相對弱，反觀中國利率高，中國經濟又強，人民幣相對強，升值好合理。現在情況逆轉，美國收水，明年加息，美國10年期債息亦由去年5月時的1.5厘，升至近期的2.8厘，美國經濟轉好，美元亦應轉強，點解人民幣唔應該貶值呢？加上中國經濟疲弱，有大條道理支持人仔貶番少少，中國家不應太怕美國反對。
減息招數 壓抑銀行
那麼人仔會貶多少？若阿爺貶人仔只為刺激經濟，到有一定刺激效果時，就會收手，不應貶太多。我估一年貶10%呢種就叫做多，貶3至5%都係可接受範圍。若然貶2、3%之後，中國出口已有反應，阿爺就唔會再貶。因為人仔貶值太多太快，始終不利外國對人仔的信心，而且美國對中國貿赤增加太快實會嘈，所以阿爺應該點到即止。不過，過去投資者好似覺得人仔只會升不會跌，大量熱錢流入中國後，買理財產品都有7、8厘，加埋匯價賺梗10%樓上，出現「買人仔，搵快錢」的風光日子，但如今呢條方程式唔一定得啦。
阿爺另一個應對經濟下滑、忍而未發的招數係減息。經濟過熱，加息；過冷，則減息，一開始減息又會係一個減息潮，唔止減一次。減息有利驅趕熱錢，減低借貸成本，亦有助資金鏈的連接，更係內房股的一支強心針，有助恢復經濟元氣。阿爺有人民幣貶值加上減息這些工具在手，以應對經濟減速，所以我估今年中國經濟增長7.5%達標唔係問題。我見國企股跌咗咁多，又不妨做吓好友，睇得好過高盛啦。
分段入貨 國企唔貴
阿爺連出貶值和減息兩招，整體利好經濟，但對不同類型股票有不同影響。人民幣貶值，有利出口及航運股，減息令息差收窄，會激活經濟，但對內銀股不利，所以內銀股可能要見埋減息呢個壞消息，先至真正試到底。
紅色股跌咗唔少，反彈一兩個星期後，不排除還有一浪會來，若然到下個月見到3月經濟數字未回穩，仲有得跌吓，但我見阿爺開始出招，唔係咁擔心內地中線經濟會一沉不起。若然怕內銀唔掂，可以低撈恒生H股指數基金(2828) ，一年收到2.8厘息，好過存人仔定期，現價一注、90.1元一注、85.1元一注，分三注入場，或者3月、4月、5月各搵低位買一注亦得。另外，我雖然唔看好內銀長線前景，但投機性吸納走一轉都唔係唔得，但好多人一買就長揸，我就唔係咁建議啦。
陸羽仁
金融High Tea 舊文
