逆反心理
2014/3/24 上午 09:44:44
網誌分類: 經濟
逆反心理
利息左右投資市場，但並不等如一話加息，股市即刻會跌，剛剛相反，利息剛開始向上時，股市仲可能伴隨利率一齊升，因為經濟唔好唔會加息，投資市場唔熱唔會加息，加息初時和股市繁榮共生，到通脹比較高，利息亦要不斷加時，才會一下子推倒股市。
而家美國只係加息前夕(仲係一年前)，推唔低股市，反而仲係睇好經濟的一個反映，所以美股應該仲有得炒。
減息通常有利股市，但正如加息之初一樣，減得息，一定係經濟差，減息初段，對經濟未必有即時作用，甚至經濟的壞數據還在反映，所以減息也要一段時間，才會令經濟轉好，股市初時也較反覆。中國經濟仲衰緊，而家只係人仔匯價下跌，都未減息，所以而家炒是有少少超前炒轉勢，未來要預咗仍有反覆。
但在股市浮遊，短炒要順勢，用搭順風車式坐一兩個站走一轉。中長線卻要有逆反心理，人人話唔得的時候，可能是比較便宜的時候，反而可以買吓。所以我才說高盛話睇淡中國經濟增長由7.6%調低到7.3%時，我做好友，估中國今年可以達成7.5%的目標。所以又唔可以睇得太淡國企股。
上週五係美股股指期貨、股指期權、股票期權與個股期貨到時到期的「四巫日」，大市一般都比較波動。美股先升後回，以微跌收場。標普500指數早上刷新歷史紀錄，但後力不繼，摸一模頂就一路回頭走，以接近全日最低位收市，倒跌5點至1867點，杜指跌28點至16303點。
美國上周出爐的經濟數據強勁，費城地區製造業與領先經濟指標指數都好過預期，正好表明聯儲局主席耶倫決定繼續削減每月買債規模100億美元，以及提前加息日期至明年春季，係對經濟增強的信心表現。推動美股週三週四大漲，杜指全個星期漲1.5%，標普500指數亦升1.3%。
上週五達拉斯聯儲行長費舍爾發表講話，指出市場已經耗盡了量化寬鬆的積極作用，年底前終結所有買債係正確做法，在這段時間市場波有所增在所難免，在10月結束；他認為調整超額存款準備金是一個可能的退出工具，所謂超額存款準備金，指是金融機構存放在中央銀行、超出法定存款準備金的部分，主要用於支付清算、頭寸調撥或作為資產運用的備用資金。又強調聯儲局其實沒有調整短期利率的時間框架，或需「相當長一段時間」。暗示明年春季加息，有一個前提，要睇乎經濟屆時的狀況。耶倫對經濟轉強的信心比較大，提早加息的態度度亦比較堅強。
提前加息預期升溫，息差將會拉闊，有利銀行盈利表現，金融股係拉動上周升市的主要火車頭，上週五大市偏軟，杜瓊斯金融指數仍能逆市企穩，頂住大市。加息對房地產市場不利，房屋建造股就比較傷，安碩杜瓊斯房屋建造指數基金上週五跌1.6%，拖累大市。
美國今年係收水年，先逐步買債，明年才加息，要我估，我估佢停買債可以軟著陸，市場已消化了。
陸羽仁
回應(3) 我想回應
陸羽仁 BLOG 舊文
