異動空間：華禧炒作誘因多 - 魏力
阿爺GDP好過預期，唔少戰友都在fb問魏力有乜可以撈？坦白講，滬港直通車炒咗，人心虛怯，個市動力欠奉，加上長假前夕減磅才是王道，孤身衝入火場多數中伏，不如都係慳番幾粒子彈！大明國際(1090)算係近期較有反應的推介，全日漲19%，收1.94元，突破三頂阻力，成交創三年來最多，睇盤路震倉後應該仲有得去，未上車可留意住。細價股風雨飄搖，早兩日《蘋果》開埋名指近排爆煲嗰幾隻，都係用同一間野雞核數師行，一來可以慳皮，二來條數梗係燙手山芋，先會搵到呢類細行搞。
今日介紹的華禧控股(1689)，蚊型size，但係用big four羅兵咸做核數，肯咁揼本，仲要過到羅兵咸呢關，值得望多兩眼。華禧去年12月上市，招股價1.35元，主攻香煙包裝紙。上市前獲同業順泰(1335)斥2,000萬入股，料有一定實力。大股東揸72%股權，仲未過禁售期，貨源歸邊，沽壓甚輕。截至去年9月，純利2,486萬元，增長3.2%，不過不失。當下半年增長一成，預測PE 8.5倍，頗為吸引。再者主板殼價都炒到5億元，華禧市值5.8億元，盤數乾淨，當殼炒亦有價值，目標先睇2.3元。
魏力
http://www.facebook.com/2012jason
上一則: 何車500：山水水泥候低吸 - 何車
下一則: 青心直說：與國家對著幹 - 胡孟青
異動空間 - 魏力 舊文
