豬肉股包銷大堆頭
2014年04月17日
今個星期港股假期味濃，經過滬港通刺激一輪，大戶把握難得機會炒上殺死大批淡倉後，咁就可以收工。由於早前已在低位殺咗一批好倉，而家連淡友都殺埋之後，睇嚟大戶都趕住放復活節假收埋工，索性等個市自由浮動，結果恒指收市報22696，由最多升195點變為勉強升24點；國企指數收報10035，升7點，不過成交金額由昨日的636億元，縮減至545億元，創馬年新低！
收市後，中信泰富(267) 宣佈注資詳情，集團向阿媽中信集團及中信企業管理收購資產，轉讓對價為2269億元人民幣(相當於2865億港元)，其中1770億元人民幣按照每股13.48元收取新股支付，發行價相當於今日收市價14.3元折讓5.73%，未來公司會正名為中國中信股份有限公司，完成一個中信集團注資變相整體上市的過程。
變身阿媽 好過舊時
今次注入的資產包括金融業、房地產及基礎設施業務、工程承包業、資源能源業等領域，當中包括中信銀行(998) 、中信證券(6030) 、中信信託、信誠人壽、中信地產等，這批資產過去三年股東應佔淨利潤為317億元人民幣，年複合增長率為4%。期內，股東權益年複合增長率約為17.7%，以作價計大約係7倍市盈率。由於中信集團持有這批資產主要係控股性質，一般會存在折讓，所以作價雖然唔可以話貴，但暫時睇唔到最突出的增長賣點係乜。不過無論如何，中信泰富變身成為阿媽，總好過以前集中做不太成功的礦業。估計中信未來表現主要係睇市場對中資股份的整體評價。
大戶無心戀戰，但好可能係今年上半年最大單的IPO上市，就繼續進行。內地最大豬肉加工商萬洲國際(288) 集資上市，但好奇怪係冇乜聲氣，經紀行唔見宣佈叫人借孖展，我估主要因為同類型的股份好似惠生(1340) 、雨潤(1068) ，股價呆若木雞，自然好難引起散戶興趣。萬洲前身係內地主要豬肉加工商雙匯，佢係去年成功收購美國同業史密夫菲爾斯，成為行業領導者。
本來作為行業一哥，應該享有較高溢價同吸引力，萬洲上市反應比想像中靜，一個原因可能係同內地近年豬肉需求不振，相關公司紛紛蝕到入肉有關。
配售夠飛 上市難炒
據說萬洲講起佢在美國收購的公司，就話中國人同美國唔同，美國人好多嘢唔食，中國人成隻豬連內臟加豬腳豬頭豬尾都食埋，佢哋做美國公司利潤率會好啲咁話。但我話萬洲生意得唔得主要睇內地豬肉銷情，豬肉價格在內地，一向被視為是政治敏感之肉，因為佢對消費指數有相當影響，若然肉價升得多，就令人有通脹升溫之感，加上呢兩年豬肉生產過剩，搞到好多養殖公司叫苦連天，幾間係內地上市的上游公司業績都見紅，仲有間乾脆重組做影視娛樂公司，實行轉行。
過去同萬洲係內地競爭的雨潤，主要股東老早已經好似對本業失去興趣，將不少資源轉咗去搞地產。呢間公司雖然同萬洲業績不盡相同，但成個產業鏈都唔係咁好之下，大大件的萬洲概念就唔係咁多。
不過聽銀行家講，你睇萬洲有廿幾個包銷商，其實係邊間銀行肯包咁上下貨已經俾你做，萬洲的策略係必定要上市，反正佢都係攞集資額3%做佣金，不如搵大量包銷商，在呢個包銷商都咁大堆頭的情況下，聽聞國際配售已經有3倍，即係佢上市唔係問題啦。
但我問過基金阿姐，萬洲唔熱，佢無入飛，主要因為豬肉股唔得，佢嫌萬洲15倍PE貴，而且集資主要用作還債，估計上市後亦難炒，所以無乜興趣。萬洲集資咁多，若然唔係咁爆，孖展申請好易中番較大比例，大家睇路呀。
陸羽仁
金融High Tea 舊文
