魚樂無窮：點解全世界估錯樓市 - 唐牛
■相信樓市周期已見頂，估計樓價會由高位跌約三成。資料圖片
美聯集團(1200)主席黃建業接受報章訪問，指今次樓市周期已見頂，估計樓價會由高位跌約三成，中原城市領先指數(CCL)歷史高位為123.66，跌三成等於86，即係要去番2010年嘅水平。如果成真，未上車者當然開心，高位追貨就肯定腳震。
金融海嘯後，儲局啟動QE，銀紙氾濫，人人買磚頭自保，加上強國人南下掃貨，本港樓價開始飛升，當時不斷有業界人士、專家、學者預期，樓價好快會回落，仲要越估越大，由以往半成、一成跌幅，去到而家嘅三成、四成都有。可惜樓價硬過雪條，一直有升冇跌，去到今年，喺政府3D辣招開始發酵下，樓價係咁易跌咗0.6%，算係畀面。
全城錯完又錯，究竟問題出咗喺邊度？加息周期遲遲未開始成為關鍵。加息令供樓成本上升，按理會推低樓價，這亦是為數不少嘅無殼蝸牛，一直都唔上車嘅原因。可惜儲局吹風加息，由2010年下半年吹到今時今日，依然都未有行動，最新嘅講法係出年第二季鬱手，係真係假睇嚟要用時間去驗證。相信加息周期開始先做預測，準繩度會高好多。
講咗咁耐，幾時先應該入市？唐牛就buy曾淵滄教授那套——如果用嚟自住，供得起就隨時都買得。
始終住得舒適帶來嘅快感，非金錢可以衡量，租樓一個唔好彩，隨時每年都要搬，transaction cost幾襟計。再講，若樓價最終因加息而下跌，屆時又要畀貴息，係咪除笨有精都係未知之數。
唐牛
上一則: 炒友Blog：賽晶造圓底分注吸納 - 邱古奇
下一則: 股場放大鏡：航天萬源整固後再上 - 歐陽風
魚樂無窮 - 唐牛 舊文
