見淡不需睇淡
2014年04月29日
港股上周跌完一輪後，昨日開市呆呆哋，但下午受內地股市轉弱關係再有啲壓力。雖然4月仲未完，但已經有中環茶友話今年「五窮六絕」可能唔易捱喎，掀起茶友間對5月沽貨(Sell in May)的深入討論。
烏克蘭局勢緊張，導致美股杜指上周五急跌140點收市，加上內地投資者擔心A股IPO重啟抽乾資金，上證指數四連瀉，恒生指數低開走軟，惟兩萬二關上見支持，全日收報22132點，跌91點；國企指數收報9770，跌28點，成交金額528億元。
多個板塊被人質
雖然指數唔係跌咁多，但好多板塊都被人質，科網股為跌市重災區，乳業股同樣全面捱沽，加埋濠賭、彩票及其他博彩類股份亦成為拋售對象，大家都話5月未到，唔同股民已經開始窮，搞出個「憂鬱四月」？
我喺網誌度寫咗篇「唔好Sell in May？」嘅文章，其中引述CNBC出咗條新聞，個題話「點解今年5月沽貨唔係幾掂」(Why it may not be smart to sell in May)，主要理據是美國企業盈利可以推動股市向上，好似花旗首席美股策略師Tobias Levkovich話，烏克蘭係全球股市的主要風險因素，但美國企業的盈利得，所以估今年夏天美股得。UBS紐約交易主管Art Cashin就從技術因素睇好，認為唔好在5月大力沽貨。
有茶友睇完就問，陸Sir你喺網誌引述嘅都係美國分析師的觀點，咁香港係咪一樣先？呢位茶友就坦言覺得香港市場情緒家都幾悲觀吓，因為唔睇指數，走去睇吓個股，好多都跌到碌咗喺地喎！
首先，我要講係我叫人未必需要Sell in May，唔係話覺得個市好靚仔，又或者手頭大把子彈等入市嗰隻，而係好基本咁講，如果個市都落咗咁多，就算已經輸咗錢被人綁住的股民，應唔應該係呢個時間或者5月時離場；又或者呢個時候離場，變成係低位沽貨的機會高唔高？
如果係技術嚟睇，港股今年開局唔係咁靚仔，之後出現反彈，從底部劃一條線，家初步形成咗一級級的支持位。個市再跌多幾百點，去到兩萬一千點樓上，就會到咗初步支持，到時就會考驗會唔會形成一級級向上的底部，如果個市真係成功築底，咁你喺5月份沽貨，咪有機會變咗高買低沽，差不多係最差時間沽貨囉。
茶友聽完反應係，陸Sir你年頭已經話今年五窮六絕要小心，梗係唔會揸到成手貨，唔明白家想跳船嘅股民嘅心情嘞，你咪睇指數雖然跌唔多，但個股好多已跌咗一截，揸咗貨者咁傷，真係唔知等唔等到黎明？
見淡睇淡未必着數？
我就答呢位茶友，正正係有啲股民已經坐咗艇，先至去冷靜諗吓，如果家係年頭，又或者個市氣氛好好，我反而覺得可以考慮沽吓貨食吓胡，但如果你已經坐咗貨，但成日聽話要Sell in May，結果愈聽愈驚，甚至搞到要提早跳船，咁你就諗吓咁樣人嚇人係咪真係需要嘞。
投資股市無一個策略係永遠適用，亦無一個策略係適合所有人用，故此係咪應該Sell in May，甚至提早沽貨，既要睇對後市的看法，同時要睇本身的財政狀況同揸貨量。不過，今年5、6月淡市就算唔易捱，股民都要冷靜分析，有時定咗策略捱吓價，總會好過見好睇好、見淡睇得更淡啦！
陸羽仁
金融High Tea 舊文
