一周三件：橙天嘉禾夠平 - 錢雋
■伍克波任主席的橙天嘉禾，筆者指該集團在內地影院首輪投資開始收成，前景亮麗。資料圖片
上年12月17日主打橙天嘉禾(1132)，到上個月12日，曾大升咗76%，呢期股價調整，幾乎跌到當日起步位，相對場內文化產業股，橙天嘉禾平到笑，有理冇理，翻兜。
橙天嘉禾剛啱公佈上年度張成績單，營業額達到9.3億銀，純利就突破1億銀，創咗上市以嚟新高。而2009年度，集團純利2,217萬銀咁大把，當年12月股價1.41元。家陣純利，係當年5倍，但現價(0.52元)就累跌咗64%，有冇搞錯？
新鮮熱辣祖國第一季票房，高達67.4億銀人仔，同比增近28%。國產電影受歡迎，唔再受限「西戲東輸」，對支持祖國票房好緊要，而按估計，今年祖國票房上到260億人仔(年增近20%)。橙天嘉禾亦已經計劃到明年底前，祖國銀幕數目再加多近70%，到總共597塊，食住個勢，繼續有運行。
又據中證監資料，計劃上市招股公司當中，電影文化產業佔咗20間，唔係細數。諗到係，板塊一成形，唔再係小眾股，加埋互聯網同文化產業相互激起火花，文化產業股估值，隨時高到冇譜。場內文化中國(1060)PB，高達6.9倍，剛啱改名嘅中國國家文化產業(745，前身鐵聯傳媒)，經過月中大插水，最新PB講緊5倍，祖國華誼兄弟PB，亦高達6.1倍。
博變身「蚊」型股
橙天嘉禾上年單喺祖國收入，講緊上7億銀，集團喺祖國影院首輪投資，開始收成，大膽啲估佢，已經夠資格喺創業板搞分拆，呢筆潛在增值，肯定啖啖肉。就算未計呢筆數，集團家陣PB得0.79倍，平霸！博橙天嘉禾變番「蚊」型股，見1蚊，現價要升92%，PB仲係得1.5倍，邊有耐追到行家？
錢雋
細價股專家
本欄逢周二、三、五刊出
上一則: 金手指：屈政府大茶飯 - 孫柏文
下一則: 板塊尋寶：谷奶、走奶、無奶 - 王昇
~TITLE_S~一周兩件 - 錢雋 2014年4月29日 舊文
