中環在線：傅世彪改裝廣東道物業木器大王打本太太教泰菜 - 李華華
■傅世彪太太(右)嘅烹飪中心喺母親節開張，傅世彪(中)乘機向到賀嘅媽媽送花表心意。謝榮耀攝
香港地有大把隱形富豪，隨時跟大家擦身而過。好似「木器大王」傅世彪，係尖沙嘴廣東道與加連威老道知名業主，手上物業起碼值幾十億元，但佢相當低調，為支持太太嘅泰國菜烹飪中心喺噚日母親節開張，先至罕有現身。
傅世彪太太係泰國華僑，煮得一手拿手泰菜與中菜。傅世彪話，太太一直想開一間烹飪中心，不過之前要照顧三名子女，直至今年細女都已經飛去英國讀大學，二仔傅嘉俊舊年又從美國大學畢業返港，二仔於是就替媽媽籌辦呢間烹飪中心。
4堂課程3,000元有找
佢哋喺廣東道持有個別寫字樓單位，傅太呢個千呎烹飪中心，原本就係傅世彪旗下公司嘅寫字樓，投資過百萬元改頭換面，變成烹飪中心，佢哋嘅寫字樓就搬落下一層。傅嘉俊透露，好多投資放喺煮食爐具方面。
傅太將會每星期有2、3日落場教煮泰菜，4堂課程3,000元有找，想跟隱形富豪嘅太太學廚藝都唔算貴。傅世彪話，最鍾意太太煮嘅泰式炒麵(Pad Thai)。
傅世彪喺尖沙嘴有多項收租物業，對於今年五一黃金周來港嘅內地旅客減少對商舖租務影響，必定有一番見解，可惜佢唔想搶太太風頭，兼且猛話要「保持低調」，「唔想見報」，淨係話近期冇乜留意投資機會。
傅世彪爸爸早於五十年代由內地來港，喺廣東道賣木器家具起家，傅世彪1969年完成學業就接手，故有「木器大王」之稱，家族於90年代開始喺廣東道投資收租，近年買埋加連威老道嘅物業，集中投資尖沙嘴。
李華華
mailto:LiWaWa@AppleDaily.com
■呢盤碎豬肉釀丸子係甜品，原來係傅太前晚親手搓。
上一則: 樂香園：5月買乜都輸 - 密西比
下一則: 中環在線：Easy Taxi唔攻中國避開騰訊阿里 - 李華華
中環在線 - 李華華 舊文
