國策
2014年05月12日
周末前後內地有不少有意思的消息出籠。雖然市場有不少人民銀行將下調存款準備金的傳聞，但人行行長周小川表示，短期經濟資料出來不一定說明問題，人行一直在流動性方面微調，目前國務院強調宏觀調控要有定力，不會採取大規模的刺激。
雖然周小川暗示人行暫時不會出招，但中國證監會已在動手，推出新版「國九條」，被市場視為一劑猛藥。所謂「新國九條」，係指國務院剛推出的《關於進一步促進資本市場健康發展的若干意見》，提出發展多層次股票市場，推動註冊制改革，將擴大合格境外機構投資者、合格境內機構投資者的範圍，提高投資額度與上限。另外亦將研究證券公司、基金管理公司、期貨公司和證券投資諮詢公司等交叉持牌；加大查處證券市場虛假陳述、內幕交易和價格操縱等各類違法違規行為的力度；推出支持資本市場擴大對外開放的外匯、海關監管政策。
新國九條 一劑猛藥
官方解讀指，新政策是對今後較長一段時期，促進資本市場健康發展頂層設計，作出統籌部署。市場就認為，新版國九條在內地股市2000點岌岌可危的背景下推出，可看作一劑救市猛藥，2000點可形成「政策底」。例如星石投資就話，新國九條表明了國務院對發展資本市場的重點支持，預計未來，有關於資本市場的改革紅利將源源不斷的釋出，有利於股票市場長期健康發展，為今後牛市的到來，奠定了良好的制度基礎。
你都知內地股市呢兩年幾咁弱，新國九條係唔係如內地證券界估計咁猛料，尚待觀察，不過阿爺肯出招，總好過唔郁手。
周末與一個對股市有研究的中環茶友食飯，見到內地又出國策，我哋熱烈爭論中國經濟掂唔掂嘅問題，我覺得OK，茶友卻認為有危機。我長線睇好，佢長線睇淡，至於短線大家不約而同都唔係咁睇好，認為仲要捱。
去槓桿化 在所難免
呢個中環茶友提出來的論據，好現實。中國經濟這10年高速膨脹，但貪腐太厲害，內地銀行體系借出10元，用到實體經濟上的，只有2、3元，其餘的7、8元都給蒸發了，其中相當部份給貪了，程度相當驚人。為了維持經濟的虛長，過去幾年胡溫時代，不斷擴大信貸。體制漏水使10元只用到2元，但當放大了5倍，就用到10元啦。2008年，溫總更大手筆泵水4萬億元刺激經濟，令到經濟拗腰反彈，副作用係造成了更大的浪費。
據國家統計局資料顯示，中國對上的12年以來，廣義貨幣供應量(M2)，年複合增長率達到17.7%！12年喎！中國社科院最近亦提到，2012年，內地居民、非金融企業、政府部門及金融機構的債務餘額111.6萬億元人民幣，債務與GDP比例達到215%。加埋從國外部門借入的外債，更去到228%。單係影子銀行的債務，餘額達72.1萬億元，佔GDP比重139%。中國借貸過高，去槓桿化在所難免，咁樣水頭缺缺，經濟點會好？
我基本上同意朋友的分析，唯一有分歧的地方係新一屆政府上台後在官場上大力打貪，經濟上則去槓桿化，係有意識有控制的調整，未算太失控。去年中國的M2增長已降低至13%左右。阿爺刻意收緊信貸，就衍生出近期的經濟增長放緩，以及錢荒的問題。我覺得這是必要之惡，繼續捱落去，係可以見到隧道另一邊的光明。
中環茶友插嘴，單係信貸健康番啲仍然未夠，只是停止惡化，未可以突破經濟發展的樽頸，還要經濟轉型，質量有所提升，才有前景。這方面我也同意，當中仍有不確定因素，唯一的方法仍係不斷尋求出路。例如發展高質素、自主性強，以及有創新性的經濟，的確唔易搞。
銀行暴利 長久唔易
其後，我和茶友討論到國策對公司影響的問題。最新有篇文章講到中國去年最賺錢的幾個行業。銀行及能源業係大贏家，當中10間最賺錢公司，由7間銀行及3間石油公司包辦，其中國有四大銀行，工行(1398) 、建行(939) 、農行(1288) 及中行(3988) 排在首四位，其餘就係「三桶油」(中石油、中石化，中海油)。繼續排落去的賺錢行業依次係金融保險、汽車、房地產同白酒行業。
呢啲行業特別係銀行業比較暴利，按理不能長久，起碼是盈利咁高，仲要年年雙位數增長的現況不能長久，市場擔心四大銀行、三桶油將被打破壟斷唔睇好，佢哋市值咁大，少人買佢哋的股票，股價唔好拖低內地指數。但呢啲股已跌咗唔少，我向來亦不喜歡見淡唱淡，更不會一竹篙打晒一船股。我從阿爺的政策取向，分出三類企業：壓抑的、調整的、以及保護的，要區別對待。
我提出一個較少人提的觀點，最可能會受到阿爺壓抑未必係國企，可能係境外的賭業。據報道，去年澳門賭場公佈收入450億美元，市場估計可能報少了50%。當中的大部份的錢由內地人貢獻。接近成個國家超過1%的GDP總值白白流走了(恐怕實際更多)，中國人的血汗錢白白俾外地人賺走，以習近平主席上台後全力打貪反腐的風格，好難容忍呢種事情長期發生。
賭業受壓 勢所難免
收緊內地過境逗留澳門期限、銀聯出招打擊洗黑錢，以及賭場範圍取消銀聯終端機的措施，只係剛剛開始而已，估計更嚴厲的措施，將陸續有來。澳門開個賭場，揸住個砵，咁就接走中國全國一年1%、2%經濟總量，有無咁離譜呢？呢種吸扯中國資源、並年年猛增的狀態，好難持續也。最近濠賭股跌咗唔少，但平均PE率仍在20倍以上。每年沒有20%、30%以上的純利增長，如何頂得住咁高嘅PE？所以賭股將會受到壓抑，當然不能排除他們跌得多會反彈，但也不是一種很好的長線投資。
第二類要調整的、主要係阿爺又愛又恨的行業，包括房地產、金融、電訊。阿爺比較憎恨嘅，莫如房地產，因為房價高民心不穩，阿爺最怕，加上大量內房係民企，唔係阿爺親生仔。按理樓價跌三四成，阿爺應該無任歡迎。但現實上樓價下跌是雙刃劍，在去槓桿化當中，經濟本來已經慢，如果樓價短時間內急跌兩三成，經濟會急速放緩，中國經濟增長保唔住7.5%，地方財政都可能會破產。所以最後阿爺只能夠畀樓市調整吓，見樓市跌得太急，就放水支持，見佢過熱，又要再調控。
電訊全開 中移腳軟
對內銀的態度差唔多，雖然銀行係國企，即係親生仔，但銀行業已經過份壟斷，早就肥到着唔到襪，錢又應借唔借，唔應借的反而亂借，只借予沒有效率的巨企，不借予有活力的中小企，資金錯置，損害了經濟效率，因此阿爺會逐步開放利率。但內銀底子仍差，經受不了風險，所以也不會開放得太快，怕銀行業會爆煲。
好似銀行業咁等住開放競爭的重有大把，好多無咁影響經濟大局，例如電訊業，工信部、發改委上周末就聯合發通告，開放所有電訊業務收費，以後固定和移動電話、本地、長途、漫遊語音服務、短訊息、資料業務等，所有電訊業務收費都由市場調節，意味着電訊資費完全市場化，鼓勵提供更優惠資費方案。呢個開放措施對中移動(941) 呢個老大哥最不利，表面上對聯通(762) 這個市場二哥較有利，但你想想中國發出了大量虛擬電訊商新牌照，佢哋向現有電訊商租網就可營運，未來都係世界大戰，中移動最唔掂，聯通和中國電信(728) 亦唔好，香港開放電訊業的經驗有版你睇。所以我唔明點解在已完全開放競爭行業的中移動有9倍PE，在仍未完全開放的內銀只有5倍幾PE。
除了上述那些被不同程度打壓的行業外，還有不少軍工、有效率的創新企業就係第三類受保護的行業，可惜呢啲公司良莠不齊，行業競爭又大，唔係好易搵到好公司去投資。
我同茶友雖然對中國長遠前景看法不一，但都認為短期要捱，同埋最好要避開受重壓的行業。
陸羽仁
金融High Tea 舊文
