中環在線：香港拍拖使費平過星滬每次平均使$468 - 李華華
財金界港女拍拖一次過千蚊
香港、新加坡與上海成日喺經濟領域爭做乜乜中心、物物中心，德銀最近公佈「平價約會指數」，香港就確實輸畀星、滬，情侶食麥記、睇場戲嘅成本低過另外兩個城市，平均消費468元。
德銀自2012年推出平價約會指數，呢個指數類似巨無霸指數，都係想睇全球各大城市嘅生活成本，主要以情侶坐的士、買麥記漢堡包、汽水、啤酒加埋兩張戲票嘅成本做計算，由於舊年計算組合唔同，冇法將兩年情況作比較。肯定嘅係，香港平價拍拖原來平過新加坡同上海，北京仲差香港少少，不過都好接近。其實眼見強國人來港掃名牌嘅瘋狂情況，都估到京滬嘅消費能力強。若平價拍拖嘅平均消費468元，財金圈好多人年薪過百萬元或好有家底，每次拍拖又使幾多呢？
■財金圈好多人年薪過百萬元，但每次拍拖都唔係個個咁大使。
孫柏文煮飯仔都使$800
有位律師男友嘅耀才財經台主播鍾蔚茵(Jennet)透露，每次拍拖平均消費過千元，主要由男友埋單，最大使費係食飯，大概800元一餐，「最緊要係好食，不過通常好食都貴」，佢認為，按收入比例計，呢個約會使費唔算好多。
股評人孫柏文平日拍拖冇街去，多數在家煮飯仔，但佢買嘅食材絕對唔平，「由於廚技唔好，所以要買好食材」佢每次買靚牛排同鵝肝，起碼800元。
對於有樓要供或要儲錢買樓嘅情侶當然又唔係咁講。28歲嘅新鴻基金融高級證券分析員李惠嫻(Hannah)就係典型香港後生仔女，正計劃同男友儲錢買樓，目標係儲三成首期，所以乜都要慳，一次約會都係使200、300元，通常都係食飯，其他活動可免則免。講到底，唔係人人喺財金圈都搵到十萬八萬一個月。
iPad指數或取代巨無霸
德銀公佈「平價約會指數」主要希望用另類方式，反映全球各個城市嘅生活指數，英國倫敦與愛丁堡分別排第一與第三，法國巴黎排名高亦不足為奇，奇就奇在，以往公認係高消費水平嘅日本東京，竟然只係排第七。德銀認為，主要因為日圓兌美元滙價疲弱所致。
查實坊間都有呢類有趣指數，最出名就係《經濟學人》炮製嘅「巨無霸指數」(Big Mac Index)，反映全球匯率嘅相對強弱，直接利用全球各地嘅巨無霸售價，去比較各國貨幣嘅平價購買力，1986年首次推出。
不過，巨無霸指數都可能要面對挑戰。美國外交關係委員會(CFR)近日指，一般人唔會出入國境去買一個巨無霸，舉例，就算匈牙利嘅巨無霸較美國平17%，都冇人去匈牙利買，故建議用iPad mini去建立類似嘅指數，取而代之。
■「平價約會指數」由漢堡包、汽水、啤酒、兩張戲票及搭的士的使費計算出來。
【拖友心聲】
王先生：「拍拖100蚊都OK，可以去普通茶記食餐飯，主要睇另一半會唔會比較高要求。」
■王先生
鄧小姐：「我會食麥記㗎，拍拖要使300、400蚊，會同男朋友一人畀一次，交通都少搭的士，多數搭小巴。」
■鄧小姐
卞先生：「倫敦拍拖要使900幾蚊算貴，一般平民百姓都唔會搭的士，不過自己拍拖出一次街都要700至1,000蚊。」
李華華
mailto:LiWaWa@AppleDaily.com
■卞先生
上一則: 新iPhone加入銀聯支付
下一則: 中環在線：超盈內衣騷過百人捧場 - 李華華
中環在線 - 李華華 舊文
