斷症落藥
2014年05月13日
內地推出「新國九條」，市場即時反應係對佢期望唔係好高，港股開市先升後軟，之後內地股市向好，才帶動港股不斷爆上，本地成交676億，叫做好啲，但熱度未足夠。
希望紓緩「IPO恐懼症」
「新國九條」推升個市，主要係跟內地股市走，內地又點解讀新政策呢？分析家指出，近年內地股市不振，多少係源自對內地新股解禁的恐懼症，大家擔心公司上市圈錢，令股票供應源源不絕，市場因此患上「IPO恐懼症」，每次一聽到新股解禁，個市就腳仔軟晒，家又有300幾間A股公司排住上市，搞到內地股市死氣沉沉。
阿爺今次出招，「新國九條」提出其中一樣係「積極穩妥推進股票發行註冊制改革」，在提高上市公司質量同時加快多層次股權市場建設，壯大主板、中小企創業板市場，同時在清理整頓的基礎上，將區域性股權市場納入架構中，希望斷症落藥慢慢理順市場關係，醫番好市場對「IPO恐懼症」的憂慮。即係話覺得中醫開藥調理到你身子強壯，循環加快，咁你的「三高」都好埋。
港股受惠「新國九條」消息推動，早段一度倒跌66點後馬上隨A股抽升，升幅更擴大至537點，尾市升勢放緩，最終未能企穩50天線收市。恒指收報22261點，升398點；國企指數收報9827點，升143點。「新國九條」被市場認為中央睇重資本市場發展，要使新股發行制度與國際接軌，內地證券股因而被炒高。中信證券(6030) 、銀河證券(6881) 升近5%，其他證券股紛紛造好。
究竟「新國九條」有無咁大威力，長遠要睇政策的有效性，短期就要睇對內地股市的刺激係咪可以持續。講到底，要搞好股市唔係靠把口話推幾條政策就得，仲要睇落實成點，呢樣嘢要經過時間觀察至可以確定同驗證到，呢排我成日叫人見淡唔使睇得再淡，見好都唔使急急轉好，「新國九條」大方向俾人有希望，但亦唔等如投資者見到呢類國策升市就要即刻撲埋去，等佢回吐至買都未遲呀。
大市爆升，另一焦點係近排跌到散戶心驚的科網股，不過今次佢唔係帶頭跌，而係帶頭彈，股王騰訊(700) 一舉做番啡底股，喺低位撈貨炒拆細的散戶，如果買得夠平，暫時就嚐到甜頭。
騰訊自從宣佈拆細後，消息都支持唔到股價，隻嘢仍然一級級咁落，由高位計，調整咗差唔多四成，當初聽見佢拆細湧入去者，家好多仲係坐緊艇，雖然佢昨日彈得急，但賺錢者唔多。
阿里遞表有效應
除了跌得急彈番同炒拆細，騰訊湧番高可能都同海外市場有關，因為佢有份投資的京東商城，傳話有意係阿里上市前截胡登陸美股市場。騰訊當日入股京東，價錢唔係貴，揸住14.3%，係京東第三大股東，今次京東去美國上市聽講為咗同阿里搶客，價錢未必會去到咁盡，但騰訊仍然應該有可觀帳面利潤。
陸羽仁懷疑騰訊回勇係同阿里在美國上市有關。阿里上周終於向美國證券管理委員會提交首次公開上市計劃申請，市場預估集資規模達200億美元，有望成為美國史上最大IPO。阿里市值將達2500億美元，將成為全球僅次於蘋果、谷歌和微軟的「科技股四哥」，超過騰訊。投資銀行要造成呢單大生意，自然想搞到場面好好睇睇，咁美國科技股呢排跌咗咁多，想搵大錢的投行除咗唱高阿里個上市價，方便將來有水位減價之外，又會唔會喺上市前做吓功夫去粉飾太平呢？在香港科網股點走，在香港推升騰訊5%，等佢有個似模似樣的反彈，都可以配合阿里上市喎！
陸羽仁
金融High Tea 舊文
