一周三件：冠軍瓣瓣都掂 - 錢雋
■冠軍科技三瓣主要業務半年純利皆保持有26%增長，前景亮麗。
冠軍科技(092)唔單止食正祖國嘅科技熱，其主打保安系統，亦一樣食正祖國越嚟越重視嘅民眾安全瓣數。而集團就唔聲唔聲，喺前年先拓展嘅文化業務，原來好掂檔噃，中線玩分拆仲得。當冠軍係IT股、文化相關股、國安股，點樣作比較，都係平咗一大大截。
冠軍早喺2011年，已經快人一步，set up咗個「國土保安」嘅部門，為客戶度身訂做綜合保安系統。而集團兼喺當年參與北京公安局搞嘅反恐技術裝備展覽會。去年嘅三中全會，阿爺成立咗國安會，睇到對國家、民生安全越嚟越重視，相信阿爺對呢瓣設施資金投放，只會有多冇少(十二．五期間，已講緊斥資6,250億銀人仔)。冠軍除咗IT，呢瓣國安，又食正國策時勢。
再睇冠軍近兩年年報，2012年度，就多咗一瓣「銷售文化產品」sector。而喺2013年度，呢瓣項目收入就一支箭升咗84%，到近9.9億銀，貢獻達6,244萬銀分部溢利。今年上半年度，文化業務收入，兼追到上年全年水位，項目分部溢利增長33%，到4,732萬銀。
PB低殘值博
冠軍文化業務，頭炮已經開得咁靚仔，兼同原有IT業平分春色，唔係講玩笑，中線少少，若果肯搞分拆，冠軍增值肯定係啖啖肉嗰隻！
咪扯咁遠，冠軍有上邊三瓣項目，三頭馬車，今年全年度純利，keep住半年26%增長，冇難度。
再講，冠軍現價(0.188元)，唔係同2008年金融海嘯價相差太遠(10月慘烈期收市價0.101元)，家陣PB，得0.15倍，大大大幅折讓85%，比對邊一瓣行家，冠軍PB肯定平霸。冠軍翻一番到0.37元，PB講緊都係得0.3倍，仲係超級低殘。
錢雋
細價股專家
本欄逢周二、三、五刊出
上一則: 投資學堂：阿里疑似明燈 - 譚紹興
下一則: 滙海探戈：央行掹水喉歐元熄火 - 奇兵
一周三件 - 錢雋 舊文
