分身搞驚喜
2014年05月16日
越南排華示威影響股市，三間宣佈關閉越南工廠的香港上市公司，昨日股價齊挫，其中印刷線路板生產商奕達(2662) 最傷，大跌10%；天虹紡織(2678) 跌7.5%；信星(1170) 下滑3%，設廠都要揀地方。
過去一個星期，越南局勢急劇惡化，當地發生排華事件，不少工廠被搗亂，最慘係一班台商，唔單止生意受影響，仲有人命傷亡，喺咁環境下，好多係越南設廠的股份都跌到一仆一碌，除非當地局面好快回復正常，工廠開番工，否則若要搬廠的話，真係有排衰。
近幾年中國同鄰近地區關係緊張，最令人注視的當然係菲律賓，因為除咗主權爭議，仲有單香港遊客喺當地被殺的悲劇。不過，有熟悉區內政局的人同陸羽仁分析，話菲律賓同越南好唔同，賓仔成日喊打喊殺，其實講多過做；越南就唔聲唔聲嚇你一驚，對海上資源包括油氣在內十分眼熱，而且佢同中國有邊境接壤，雙方張力更大，中國對越南更有戒心。
越南排華對港股無影響
越南同中美兩個大國關係好奇怪，中國曾經協助越南打走美軍，可惜後來鬧翻，鄧小平出兵打懲越戰爭，中國慘勝之餘種下長期矛盾，反而美國佬雖然吃了敗仗，但對戰時係越南地氈式轟炸同使落葉素(由於美軍怎樣轟炸也不能摧毀游擊隊地道，最後以落葉素令樹林寸草不生)有種歷史罪咎感，隨着近年越南開放，兩國關係大幅改善，間接令越南企硬。
至於點睇今次事件，從國策層面分析，呢次反映咗地緣政治緊張表面化，唔單止係越南，菲律賓、日本都有軍事摩擦的風險。有人從投資角度睇，擔心中越會唔會開戰？如果擦槍走火，港股會唔會大跌？
根據過去經驗，如果東南亞發生政治不安，包括排華事件，資金係會搵安全港停泊，一般華僑係會揀新加坡同香港。如果係印尼一帶，佢哋泊錢就會揀新加坡多啲。至於越南，若果有留意的話，幾年前本地豪宅市場仲有得炒時，都有越南資金活躍，好明顯佢哋除咗係要錢搵錢外，仲有分散風險之意。
今次越南排華，同樣係相關概念股跌得勁，但對大市就無乜影響，可以咁講，呢次搞出暴亂，越南損失會大過中國同香港，所以對港股影響相信唔會好大。我話擔心大市升近23000點殺晒淡倉之後會回吐，可能現實過擔心中越開戰。
大市昨日另一焦點係公佈靚靚業績的騰訊(700，臨時編號2988)，恒指受惠騰訊季度業績佳，開市已升144點，之後升勢一度大幅放緩，惟尾市買盤再度湧入，最終收報22730點，升148點；國企指數收報9971點，跌20點，成交金額549億元。
騰訊早前宣佈拆細，昨日開始一變五的，可能預知業績會報佳音，所以搞個分身戲法加強驚喜效果，公司首季純利按年及按季勁增60%及65%，即被多間大行唱好，拆細價收報108.8元，大升近6%，不但是升幅最大藍籌，仲做埋升市功臣。
拆細配合靚成績表
騰訊業績前，已經見有美資密密掃入，結果派成績表真係開大，好多大行都出報告贈興，高盛讚騰訊首季業績標青，向上修訂其18個月目標價，由700元升至720元，即相當於拆細後的144元，維持「買入」評級。高盛認為，微信每月活躍用戶年增87%達3.96億戶，且有關開支因集團成功透過建立智能手機消費行為，已可以回籠。
另外，騰訊6隻手機遊戲佔內地iOS排行榜頭十位，料相關增長將會持續強勁；同時廣電通推動廣告收入增長39%，而視頻收入受惠議價能力提升，總之就講到前景一面光明！
陸羽仁
金融High Tea 舊文
