一周三件：港建殘煲冷灶 - 錢雋
■港建周二最低見0.201元，筆者認為無理由股價如此低殘，反而是煲冷灶機會。
香港建設(190)係極少數質穿2008年金融海嘯價嘅內房股之一，現價得番NAV一折幾。集團主打內房地區又正係呢期醞釀升格自貿區嘅熱爆天津市。港建殘到冇曬譜，輕輕追番同級行家，已經要升67%。港建上年純利，表面倒退30%到7,300萬銀，但集團2012年度，出售附屬公司及撇賬回撥，高達1.9億銀。唔計呢項非業務收益，2013年度張成績表，係大turnaround兼靚仔到爆。又港建手頭現金高達24億銀，淨負債比率得7%，財政又alright。
但剛啱周二，港建最低見0.201元，質穿海嘯期最低價0.203元，現價(0.21元)亦相對海嘯月收市價0.327元，玩大潛水56%，殘到冇理由！
港建上年嚟自天津內房銷售額，上到7.6億銀，地區開始收成同時，集團喺天津仲有唔少在建項目同土儲。講過新一屆領導好睇重天津，港建呢批項目，就好值租。就算唔計增值，齋用上年尾NAV 1.16元去計，港建折讓高達82%，得0.18倍PB！
場內近市值近級數內房，漢國(160)連埋供股後PB約0.3倍、湯臣(258)0.29倍，力寶華潤(156)0.7倍樓上。又漢國現價，比對海嘯期最低價，高出1.9倍、湯臣高90%，力寶華潤更高出25倍！
大股東連番增持
2012年尾，港建大股東黃剛，真金白銀4,630萬銀，增持港建1.6億股，每股成本價0.292元，港建現價又係潛曬水。剛啱上個月22日，黃生再出手，輕注買入125萬股，每股成本價0.219元，證明港建現水位超吸引。
冷灶煲港建，上返黃生2012年增持浮水價0.292元，要升39%。港建PB，只係收窄到漢國同湯臣0.3倍水位，亦講緊要升67%到0.35元。
錢雋
細價股專家
本欄逢周二、三、五刊出
上一則: 投資學堂：撐六四紀念館 - 譚紹興
下一則: 滙海探戈：英鎊1.7算阻力大 - 奇兵
~TITLE_S~一周兩件 - 錢雋 2014年5月2日 舊文
