馴獸
2014/5/2 上午 09:46:34
網誌分類: 經濟
美國聯儲局議息會議上日結束，一如市場所料，繼續削減每月購債規模100億美元至450億美元，利息則保持不變。聯儲局又重申，完全終結QE政策後，仍會維持超低的短期利率至「一段時間」以支撐經濟，至於加息的具體時間表，卻未有表示。
值得留意的是聯儲局再講會取消了上任主席伯南克定下的6.5%失業率作為加息的門檻，表示將會監控一盤子經濟數，以決定經濟的進展是否迎向當局的兩個經濟指標：全民就業和每年2%通脹率。大多數的經濟學家估計，2015年中前都唔會加息，受唔會提前加息的消息提振，美股當日造好，杜指收升45點，昨日跌番21點，美股高位無回落，證明聯儲局議息的結果利好。
在聯儲局公布議息結果當日，美國政府表示美國首三個月的經濟增長年度化只有0.1%，係一年多以來最低。經濟學家普遍認為增長之所以咁差，全因為嚴酷的天氣影響，並預測今季度經濟增長會好番，會反彈上3%。
不過好多大行對美國GDP增長預期唔係咁樂觀。鑒於美國3月營建開支疲軟，較上月增長0.2%，遠差過預期的0.5%，前值也遭下調，多家投行下調美國第一季度GDP的預期。德意志銀行下調0.4個百份點；巴克萊銀行下調0.3個百份點為至-0.2%，而高盛則下調0.2個百份點至-0.1%。
另外，昨日公布的上周首次申請失業救濟人數增加萬四人至34.4萬人，創了9周以來新高，亦遠高過市場預期的降至32萬人。美國今晚將公布4月非農就業數據，市場估計新增職位21萬個，較為上月的19.2萬為高。投資者表現轉趨謹慎，大市亦沒有明顯方向。
咁聯儲局議完底方向係點，好似好無乜方向? 我又唔係咁睇。聯儲局係進行緊一個馴獸過程，去年6月起前主席伯南克要大家接受逐步減少買債，最後年底開始每一次議息都減少100億美元買債額(到今年10月或12月停曬，我估係10月)，大家又好似無嘢咁，市場係被聯儲局馴服咗，停放水咁大件事當無事。
如今耶倫上台，進行第二個馴獸過程，要大家接受加息，由明年中開始加息，可能係每次加0.25厘咁加上去，起碼加4次加番到1厘先至停。所以市場對加息預期升溫，但股市唔太跌，而家杜指升近高位，納指完全跟唔到，第一波要先睇杜指升唔升穿高位，如果升唔穿就大回，都幾麻煩。若杜指明顯向上，第二波要睇納指會唔會止跌回升。
陸羽仁
回應(2) 我想回應
陸羽仁 BLOG 舊文
