魚樂無窮：港股衰過李香琴上身 - 唐牛
■港股近期表現極曳，筆者強烈建議大埔lulu著番件紅衫仔扮出市代表，延續做燈神話！資料圖片
還記得早前熱爆嘅Snickers廣告嗎？主角踢波時冇氣又冇力，對手一撞過來即刻散曬，被隊友嘲諷李香琴上身，但食咗Snickers後就判若兩人，喺球場上重現雄風。
前鋒港交所射極唔入
情況似曾相識嗎？無錯，近期港股衰到冇朋友，科網股洩曬氣，濠賭股買大開細，撈極都未見底。阿爺惟有伸出援手，出動滬港通能量bar，港股即以千億成交炒上，變速之快勁過美斯、C朗，可惜風光只得一時，同廣告差一大截——中堅大折讓H股隻隻大棍崛起，之後卻重返起點，擺明掛住攻冇氣回防；左右閘大溢價H股屈機式向下炒，冇速度唔夠快跑得慢，俾人話過就過；中場發電機券商股炒高後連環伸手，漏電之餘變埋抽水機，唔小心肯定觸電；左翼科網濠賭股之前谷得太盡，已經冇貨交，早熟早殘格；右翼細價股齊齊散水，高位追貨有排坐波監；前鋒港交所(388)衝鋒陷陣係威係勢，可惜射門唔係高出就係掠門而過，現時仲要逐步回補上升裂口，慘過歐偉倫單刀橫傳。
換人嗎？後備席上嘅中資股，個個有傷在身甩皮甩骨，輕則拗柴重則骨折，派佢哋落場等於打少個。
後衞甩甩漏漏、中場冇創造力、前鋒入唔到波，後備毫無支援，有林源三做龍門都死，強烈建議大埔lulu著番件紅衫仔扮出市代表，延續做燈神話！
望住呢個夢幻組合，唐牛腦海只浮起一句潮語︰「不怕神一樣的對手，只怕豬一樣的隊友。」
唐牛
上一則: 炒友Blog：同仁堂橫行區炒上落 - 邱古奇
下一則: 股場放大鏡：麗珠逆市呈強要睇實 - 歐陽風
魚樂無窮 - 唐牛 舊文
