中環在線：Jamie Oliver怕搶鏡港餐廳開張唔蒲頭 - 李華華
Jamie’s Italian殺入香港戴維斯做顧問
英國名廚Jamie Oliver創立嘅Jamie"s Italian今年初宣佈即將來港開業，唔少粉絲都期待一睹Oliver風采。
■William Lyon(左)透露，Jamie(右)為免搶去風頭，香港餐廳8月開張時不會現身宣傳。
渣打前大班戴維思坐鎮
可惜，餐廳香港及中國區行政總裁William Lyon透露，Jamie為免搶去餐廳同員工嘅風頭，已決定開張時唔來港宣傳，但佢搵來渣打(2888)前大班戴維思(Mervyn Davies)坐鎮。唔通到時由呢位財經名人為餐廳開張？
Jamie"s Italian餐廳全球有超過30間分店，新加坡、杜拜、俄羅斯都有，香港分店將落戶銅鑼灣登龍街Midtown，預計8月試業。
William曾經係怡和餐飲集團業務發展總經理，為取得Jamie"s Italian香港同中國區嘅專營權，兩年前主動搵Jamie嘅工作團體，傾咗好耐先落實合作，佢舊年成立公司Big Cat Group去經營呢個餐廳專營權，仲搵來戴維思做Big Cat主席，睇中佢可以為公司帶來中港人脈網絡。
William指，將會專注做好香港第一間分店，稍後先考慮北上，去上海、北京開店。
為保持香港分店嘅質素，食材採購、菜式烹調都會依照英國總店嘅指引，嚴格監控。William預計，人均消費250元，唔走Fine Dining路線。
Jamie"s Italian嘅海外店舖亦會照顧本地人口味，例如新加坡人嗜辣，當地分店將菜式加辣。雖然香港店嘅菜單未定好，但港人愛食海鮮，應該會有更多跟海鮮有關嘅菜式選擇。
招牌菜Prawn Linguine(大蝦扁意粉)與William個人至愛嘅Meat Plank(意大利火腿與芝士盤)到時必定有售。
李華華
mailto:LiWaWa@AppleDaily.com
上一則: 豐田全年盈利創新高
下一則: 中環在線：廚師面試煮菜全程要錄影 - 李華華
中環在線 - 李華華 舊文
