一周三件：北海磨出好劍 - 錢雋
■林定波任主席的北海集團，上年收入同純利，創了近13年嚟嘅新高，前景亮麗。 資料圖片
騰訊(700)家陣市值8,830億銀，對上一個number係北海集團(701)，市值只得騰訊0.08%。
而北海十年磨出把好劍，油漆業越造越好，上年收入同純利，創咗過去13年嚟嘅新高，營收嘅「曬士」，大過祖國行家，手執牛耳，家陣PE仲係得4.4倍，殘到不得了。
北海主打油漆同投資物業，上年度收入高達14.5億銀，當中，製漆項目收入，突破10億銀大關，上到11億銀，純利就一支箭飆升1.7倍，到1.6億銀，得4.4倍PE、0.6倍PB。祖國行家渝三峽，同一瓣嘅同年收入6.2億港銀，家陣37倍PE、2.3倍PB。另一家金力泰塗料分部收入7.8億銀，PB亦上到2.5倍，北海平咗大大截。
而北海製漆業的收入，係前邊渝三峽1.7倍，但現價(0.385元)市值，只得渝三峽14億港銀一半，北海身價，去咗邊？
北海油漆業，走中檔路線，尤其阿爺保障房，同中線城鎮化持續性發展，加埋祖國汽車市場穩步增長(今年頭一季產、銷量增加12%樓上)，照計，北海繼續好景。唔好估多，北海今年EPS係咁意增長20%到0.104元，預測PE得番3.6倍。
分拆隨時大龍鳳
北海前排公佈話有意分拆個別業務上市。集團手頭現金近5億銀，淨現金上3億銀，銀彈夠用，而家陣又超低PE，「701」呢個股票number，股價要反映靚仔業績都嚟唔切，仲話搞分拆？
諗到係，分拆後其中一隻股，有機會係大龍鳳，北海作為主體，點都有運行。唔好扯咁遠，買北海基本面超級大折讓，翻一番到0.76元計，明年度PE得8倍多少少，PB亦剛啱得1倍，未有耐追到行家。
錢雋
細價股專家
本欄逢周二、三、五刊出
上一則: 投資學堂：港交所諗得過 - 譚紹興
下一則: 滙海探戈：美元翻身靠taper2.0 - 奇兵
一周三件 - 錢雋 舊文
