中環迷你裙：時裝界的奧斯卡 - Samantha
■Met Gala呢個慈善舞會已有近70年歷史，當中最搶鏡的還看《Gossip Girl》的Blake Lively。路透社
鬱悶的5月最好睇番啲扮靚嘢，本周精選梗係Met Gala，要幾豪有幾豪，當中最搶鏡的還看《Gossip Girl》的Blake Lively。呢位美女已擔任過Chanel手袋的代言人，嗒過里安納度，最近仲結埋婚。婚後著住條Gucci裸色絲質雪紡長裙，大騷S形線條，今年先27歲，又靚又有腦，忍唔住畀個讚佢！Met Gala每年在紐約大都市藝術博物館舉行，呢個慈善舞會已有近70年歷史，目的是為博物館的時裝館集資。去年就籌得900萬美元，咁少？冇錯，見到電影、電視演員、模特兒、政商名人紛紛將一線品牌擺上身，踩上張紅地氈演著孔雀開屏的戲碼，簡直威過奧斯卡，兼且超曬支。故Samantha視呢場為時裝界神級植入式廣告，牽頭者正是《穿Prada的惡魔》所影射的女魔頭《Vogue》美國總編輯Anna Wintour。
Anna Wintour的能耐，是能夠在紙媒岌岌可危之際傲視群雄。最新數據顯示，《Vogue》3月刊以470頁廣告再度稱霸時尚雜誌，已連續五年錄得增長，更大幅拋離第二位。強勢如此，鬥膽講句呢位女強人肩負起邀請賓客的工作，豈會死錯人，品牌要曝光，明星著住品牌衫周場飛，效果遠勝喺地鐵賣成個月廣告。一勝，Anna提供平台之餘，又可鞏固人脈；二勝，頭痛的是奢華過後誰人埋單，每張舞會入場費要成2.5萬美元，已經係好多香港仔的成年人工，贏曬！
Samantha
本欄逢周一、三、五刊出
上一則: 股場放大鏡：復星好消息多快落鑊 - 歐陽風
下一則: 輪輪相扣：遊資轉戰電訊股
中環迷你裙 - Samantha 舊文
