接刀考功夫
2014年05月09日
港股近日唔易玩，雖然指數日升日跌，但不同板塊輪流調整，而且日日都有新破財，「五•一」之後，旅遊零售關連的股份，就成為沽貨對象。好似莎莎(178) 「五•一」期間港澳零售按年跌1%，同店銷售跌5%，差過預期。股份開市就跌咗落嚟，變成新破財股份。
莎莎證實零售股高危
莎莎係同類店中的佼佼者，但公司表示，今年「五•一」訪港內地遊客人數首次錄得負增長，導致期間港澳地區零售銷售較去年下跌1%，遠遜於公司預期，傳統旅遊區仲錄得顯著跌幅，零售股係陸羽仁早就認為有風險的股份，莎莎的披露只係驗證咗先前嘅睇法啫。
借住有消息話中央關注估計近數百億人民幣非法資金繞過監管政策流入澳門，相關部門要求銀聯前晚宣佈採取一系列措施，致力打擊海外洗黑錢、資本外逃和非法銀行卡使用行為，近日走勢唔係咁靚仔的濠賭股又碌低。銀河娛樂(027) 收報55.4元，瀉8%；金沙插5%，報52.55元，銀娛及金沙更是藍籌跌幅最大首兩隻股份。恒生指數就收21837點，升90點，成交金額增加至652億元。跌市中，電盈(008) 由於成功合併CSL，股價逆市算係省鏡。
據內地《南方都市報》報道，澳門已研究進一步收緊持護照的內地過境旅客的逗留期限，預計在7月推出新的措施，可能將7天縮短至3至5天不等。
報道引述澳門保安司司長辦公室提供的數據，去年持護照由內地入境澳門的旅客超過263.6萬人次，由外港或氹仔碼頭入境共24.5242萬人次，其中僅有54.8萬人次由國際機場、外港或氹仔碼頭出境前往他國，意味約八成持護照赴澳門的內地人士，僅在澳門逗留。此情況過去三年一直呈上升趨勢。報道引述澳門保安司司長辦公室表示，已留意到此類旅客上升趨勢，並已研究進一步收緊內地過境旅客的逗留期限，預計在7月推出新的措施。
另外，香港的《南華早報》報道，銀聯昨晚宣佈將「致力於打擊澳門的海外洗錢、資本外逃和其他非法銀行卡使用行為」，會打擊人民幣資金以非法形式繞過監管政策流入澳門。兩個壞消息下，搞到幾隻龍頭賭股開市即跌。
濠賭同科網係去年表現最威猛的板塊，當時大家焦點係邊隻股份可以晉身濠賭股，不過到了今年第二季，陸羽仁就留意到佢哋有轉勢跡象，由當時開始，幾隻龍頭股份調整咗差唔多四成，部份返到去起步點。
升得過龍跌亦過龍
濠賭股咁跌法，如果入咗貨高位無沽貨，家變成一場遊戲一場夢，喺咁情況下，好多人會諗係咪可以低撈或者溝淡呢？有中環茶友引述股壇前輩金句，話低撈跌緊落嚟的股票等如要接插緊下來的刀，意思係你如果藝高人膽大，撈中刀柄就會無事，仲贏來旁觀者喝采，更大機會溝中刀鋒，咁就損手收場，所以低撈同溝淡都係賭運氣的動作，所以茶友認為，如果唔係想考吓自己接刀的功夫，有錢想趁市跌買吓股，不妨先考慮其他調整咗一段時間，家比較穩定的股票。
從基本分析去睇，濠賭股家跌咗咁多，加上宣佈完業績，市盈率因為賺多咗錢而調低咗，所以數字上已無咁貴，值博率相應提高咗，但不要忘記嘅係，濠賭股都係熱炒過嘅板塊，所以累積蟹貨會唔少；二來亦都會同科網股一樣，有衍生工具拆倉的因素，令到佢哋嘅股價升時會升過龍，跌時都會跌過龍。
陸羽仁
金融High Tea 舊文
