中國4G未得
2014/5/20 上午 09:32:30
網誌分類: 經濟
美股窄幅上落，在小型股繼續反彈的支撐下，反覆靠穩。杜指收市升21點至16512點，標普500指數漲7點，收報1885點，納指升35點，造4126點。科網股和生物科技股繼續反彈，支持大市。
按美國證監會規定，基金每季都要填寫表格SEC Form 13-F，彼露手上持有的資產組合內容。往時這份報告並不惹人注意，不過，今期的報告在上星期四出街後，投資者興奮莫名，更令到平時無人有興趣、市值超過2000億美元的電訊巨人Verizon Communication熱炒起來。原來報告顯示多位股壇明星，不約而同地大手買入呢隻股，當然出現名人效應啦。
當中最出名當然係股神巴菲特嘅巴郡(Berkshire Hathaway)，增持了1100萬股Verizon，涉資5.39億美元，至於呢個係唔係股神親自落手揀股，定係手下代為出手，就唔知道啦！無透露；另外係有對沖基金之王之稱嘅約翰保爾森(John Paulson)，保爾森當季增持了870萬股Verizon，價值4.26億美元，而第三名最大買家係Dan Loeb嘅對沖基金Third Point, 增加了350萬股，價值1.72億美元。
同時間幾個投資巨擘加注買美國最大的電訊企業，點解呢？
主要原因其實好簡單，貪Verizon有穩定的高息。Verizon季度每股派息53美仙，投資者一年每股就有2.12美元現金進賬，股息回報率達到4.3厘！以巴郡持股量計，一年利息就有2千3百萬美元；保爾森收1千8萬美元，Third Point袋740萬美元。對專業投資者嚟講，高息確係一個好好的招徠。
Allianz Global Investors的Kristina Hooper表示，「嬰兒爆炸期(baby boom)出生的年齡群，正步入退休期，對於能夠派到高息，而且有升值潛力的優質電訊股，特別有吸引力。」Verizon就係期中可以考慮的企業，據Factset的資料顯示，有70%的分析員給予「買入」評級，大約25%認為「持有」。平均的目標價53.38美元，與昨日收市價49.15美元，仍有8.6%的上升空間。
今年，Verizon股價原地踏步，最近12個月計，則上升了6%，遠遠跑贏標普500電訊指數的下跌3%，但比起標普500指數的14%累積升幅就大大落後。SEC Form 13-F出街後，受明星效應刺激，Verizon大升兩日，昨日靠穩，三日升了2.5%。對一隻2000億美元市值的股而言，動靜唔可以話唔細。
巨頭買Verizon或許有其他原因，但至少與好多金融界顧問給予投資者的建議，不謀而合，電訊及公用等高息股，應該佔有投資組合中一個重要比重。電訊股又有穩固基礎、盈利前景穩定、唔錯的現金流、估值低，而且息口高的好處。Verizon股價造好，可能係只係短暫的刺激所致，但有一點頗為清楚，高息股在巨頭重金加注，已經愈來愈惹起市場注視。
睇番香港隻香港電訊(008)
，都有4.6厘股息率，不過市值就只得319億港紙，佢生意潛力亦好限，唔知係唔係受惠咗美國買Verizon呢類高息電訊股浪潮，有外資買吓佢，呢幾個月佢股價由去年12月低位3.2元左右，一直升到而家的4.39元。 咁大陸電訊股又如何，佢地生意真係唔係幾掂，唔似追到中美電訊股的走勢。中電信(728)
1月起的3G上客量大幅跌至只有3萬戶，自稱要冬眠一下。昨日輪到聯通(762)公布4月份上客數據。聯通出乎市場意外地公布上月它的移動、固網及寬頻服務上客全部大幅走樣，3G、4G上客量僅有211萬戶，按月大減117.7萬戶，上客量跌咗36%，係兩年半以來的低位，2G更唔掂，失客121.5萬戶，創咗新低。唔止手機唔掂，佢上月寬頻用戶只新增35.5萬個，新增用戶數目按月跌35.8萬個；固網客更唔見咗47萬戶，按月失13.7萬戶，出現全線失客現象。睇嚟中國電訊業正進入3G out咗、4G又未得的過渡期。 另一對手中電信在FDD制式的4G牌照出台前沒有谷客，固此聯通手機上客唔掂可能是中移動(941)加大4G推廣搶客所致。亦有可能和中央要求三大電訊商減少補貼俾客戶有關。分析員指4G手機的供應未夠，即使中電信和聯通攞到4G牌，上客仍難大升，最快要下半年才會好啲。另外手機廠要發力生產啦。
近期聯通和中電信股價走勢好過中移動，中移動盈利開始下跌，4.2厘的派息率都吸引唔到投資者興趣，今次聯通生意又開始冬眠，對股價有啲壓力，睇嚟中國電訊股在4G上客量顯著上升前，難有好表現。
陸羽仁
回應(12) 我想回應
陸羽仁 BLOG 舊文
