玩個市 俾市玩？
2014年05月19日
大市上上落落，股民出出入入，好似落場玩緊個市。但我遇見唔少嘅人，其實係俾個市玩緊。散戶固然如是，連芬佬都有少少頭痕。因為遇到這種上落市，又要睇季結、半年結，睇啱時間交到功課，唔易把握也。
早前我同一位管理中小型基金嘅芬佬食飯傾偈，大概了解他們的心態，主要係在半年結之前，唔想有大動作。對上一次同佢食飯，係2014年剛到，當時恒指仍處於大約23000點的水平，當時年頭好多口水佬講恒指今年會升到25000點，甚至28000點。我同佢不約而同地唔係咁睇好，特別係上半年更加如此，當時估上半年固然去唔到28000點，連25000都去唔到，都起碼要過了年中才會有好表現。所以佢在年初時，已見減咗倉位。家回頭睇，恒指走勢雖不中亦不遠矣，雖然插完又上番近23000點，但佢無咗舊年的痛苦。
年頭開倉 好易中招
呢位芬佬哥哥舊年就中過招，2013年上半年大市情況同今年差唔多，年初時幾好，又係好多人唱好，佢一過完新曆年即刻加倉，結果去到年中俾個市扑濕個頭。今年呢幾個月，大市彈上彈落，但佢今年持貨少好多，唔似舊年咁，坐住個大盤，鎖死咗無得郁。今年預咗輕裝上陣，反而可以跟住個市跳上跳落，低位有大把水仲可以加少少注，彈上又走，執番少少，心情自然輕鬆好多，飲得杯落。
佢對未來一兩個月睇法好審慎，甚至博恒指炒番上23000點，再減低持貨量，到過完半年結再算，佢怕大市呢個月炒高啲，大家心雄去追貨，下個月又回，俾人夾住過半年結。一葉知秋，近排大市雖然彈升，但成交稀疏，多多少少反映到這些買實貨的芬佬心態，唔好估個市點，只為自保已經唔敢大幅入市。呢幾年佢哋俾個市玩到殘，中過幾次招，所謂食少多覺瞓，半年結仲有兩個月就殺到，見個市升都唔會大手追貨。
既然買實貨的芬徒唔敢進場，散戶睇住期指成日低水，又唔見得好樂觀，點解個市仲唔跌？我斷估無痛苦，估係炒期指嘅大戶夾住個市嚟玩。
千八水位 炒上炒落
我做咗少少功課。今年以來，恒指基本係上落市(見附圖)，1月、2月、4月大約個零月就一個高位，中間夾住2月、3月、5月三個低位，頭四次的上升同下跌，都係大約在1800點的區間上下走動(見附表)。最近一次的下跌，喺今個月7日見21650點就彈，低位無對上一次咁低，跌幅亦冇咁大，只跌了1253點。從長線一點睇，大市正在轉強，這個底部高於3月20日的21137點。相信與今年下半年會搞「互聯互通」及最近宣佈的「新國九條」有關。無論如何，大市唔係直線上升，而係有相當震幅。
或許，恒指千幾點上落，未必算得上係大茶飯，但由於上落頻率夠密，平均三四星期又一轉，炒完上又炒落，總之就上上落落，期指大戶密密食，每次執你千零點，鋪鋪都有一兩番，一年落嚟，又幾和味喎！
呢個就係我經常話唔好見好唱好、見淡睇淡的主要原因啦，特別係睇短線，因為人人都覺淡時，其實大戶已反緊手，反之亦然。好似「互聯互通」及「新國九條」都係中長線利好消息，但呢啲消息左右唔到短期的震盪，只是被人借勢玩一轉。
個市好似「狗牙」咁上落，我好覺得係「人手製造」。手法亦好簡單，大戶只要睇住對手(散戶)個倉嚟夾就搞掂。大戶先做淡倉，然後隊低過市，去到咁上下，散戶就會跟隊沽貨；見到有足夠睇淡的散戶接貨，大戶就交波畀散戶，平淡倉轉好倉，推高個市，夾死所有淡倉。升到咁上下，當好多散戶轉睇好，以為仲有得升，走去揸好倉，大戶又重施故技，轉淡倉，殺好倉。如此類推，散戶不斷俾人食，最後連底褲輸埋，都唔知發生乜事！
唔殺你倉 唔會回頭
我畀個圖同表大家睇，亦唔係叫大家好似盲俠咁跟住個圖表做人，因為大戶唔係睇住個圖表做嘢，而係睇住散戶做嘢，所以大家唔好當1800點區間係金科玉律。殘忍啲講句，散戶未殺清，大戶唔轉向！好似上星期五美股杜指上日跌167點，恒指只係跌17點收場，散戶一開市覺得跌得少，走入去沽又夾死。你慢慢就會覺得美股跌港股唔跌好強，到你信個市得，佢先至回頭。你做淡倉未平倉，同大戶對着幹，佢夾到上23000點再突頭，問你揸住期指淡倉打唔打靶？
老實講，香港個市水位唔係好深，一兩萬張期指合約，已經可以將個市舞上舞落，尤其係家芬佬唔想玩、比較少成交的時候，更係期指大戶做手腳嘅最好時刻。
至於大市短期走勢，本想睇住期指低水咁多，好多散戶睇淡，咁大戶相反去做，估計仍會向上走一段。大戶未平好倉未食到胡，碰啱外圍下跌，惟有頂住個市先，所以美股連跌兩日，港股只係跌少少。如果港股真係好似好多人講嘅已經轉強，大量實盤買貨，點解成交量得489億咁少，咁奇怪？
所謂「五窮六絕」講得太多，好多散戶信到十足，喺4月尾開了淡倉。大戶借內地消息夾個市上嚟，可以講係一個頗為典型嘅「殺人」方式，我估無新國九條都會借其他消息，例如美股創新高，將個市從低位夾上，或許夾死所有淡倉，之後個市又會回番落嚟。
至於下半年，可能可以睇番好少少，因為除了上述提過嘅「互聯互通」及「新國九條」，芬佬過完半年結，會比較有膽量去買貨，大市會有比較多實盤支持。不過，大家唔好忘記，即使大市向上，都會係一個波動市，唔係一個直線上升市。若然係炒作，每一個升跌浪都唔好睇得太盡，有胡要食，同埋唔好信太多所謂基本分析，你要記住，做炒家就係要食波幅㗎咋。
陸羽仁
金融High Tea 舊文
