金手指：領匯請學舊滙控
■筆者認為，領匯日後出去買嘢，記得要學多年前嘅滙控。資料圖片
上個禮拜領匯(823)出業績，當晚佢哋搞咗場業績發報，孫柏文好幸運，因為同枱坐咗兩個買重領匯、非常長線、長線到攞咗股票出來擺喺保險箱嘅投資者。第一個係我有份搞嘅獅子山學會嘅總監王弼，第二個係本版專欄長年收視冠軍曾淵滄博士。點解覺得咁好彩？因為可以近距離觀察乜嘢叫「非理性投資者」囉！我嗰晚嘅感覺，有如《Gorillas in the Mist》嘅女主角般！
點解話佢兩個非理性？當然唔係因佢哋揸咗好耐兼好多領匯啦！呢點佢哋兩個都超勁。非理性嘅原因，係我哋呢班財演傾到領匯早排賣嘅商場，啲絕對唔係儍仔嘅買家們，居然會出以現租金計，相等於得兩、三、四厘利息嘅價錢去買。
等賤價買優質資產
曾博士話領匯咁賣，係因為買家覺得有大量加租空間，而到加嘅時間，領匯就可以畀啲左膠睇，講到加租，領匯算好手輕㗎啦！曾博士講完，兩個都咪咪嘴笑，so far so理性。佢哋非理性嘅原因，係因為我即刻問兩個：「你哋咁都仲開心？如果你做股東，只係想公司有咁多租收咁多租，以displacement、velocity同acceleration嘅關係，你哋冇理由鍾意見到領匯居然仲有咁多商場加租未加到盡？」王弼先答我，話佢寧願見領匯每年業績都升，好過一步到位。王弼講完，曾博士又好似隻招財貓咁咪咪笑。我見佢兩個實在太非理性呀！果然係財演界嘅800磅Gorilla呀！
餐飯尾聲，首席財務總監張利民坐埋落嚟傾，我同佢話：「你哋出去買嘢，記得記得要學N年前嘅滙控(005)咁。」利民兄聽到紋頭鬱一鬱好似唔明，我就繼續話：「以前嘅滙控，平日乜都唔做，有咁保守得咁保守。但當有地方發生金融危機時，佢哋就可以賤價買啲優質資產，賣家仲要好似見救命恩人咁多謝佢！」跟住我就指住王弼同曾博士話：「橫掂你啲股東等得！慢慢來啦！」
孫柏文
獨立股評人
http://facebook.com/shuen
本欄逢周二刊出
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp
金手指 - 孫柏文 舊文
