魚樂無窮：TCL通訊三箭頭攻堅
■李東生任主席的TCL通訊主打嘅智能手機業務，銷量按年勁升1.7倍。資料圖片
之前講過，全城預測樓市走勢，九成九做曬燈，皆因估唔到儲局一路唔加息。近日唔少大行終向現實低頭，其中花旗態度更180度轉變，大唱中小型住宅已見底。地產股呢輪跑贏大市，相信贏錢嘅人唔會太多，強如李嘉誠，近年都絕少增持長實(001)股份，戰友搭唔到順風車，絕對唔需要氣餒。
世界盃開鑼在即，成交越縮越小，但指數企硬唔肯跌。美股向萬七點進發，歐洲搞負利率逼銀行放水，日本又上調首季經濟增長，相信六窮月嘅炸彈，依然係中國。翻查舊年6月爆發錢荒，上海銀行同業拆息5月底已開始扯高，但觀乎拆息現時喺低位橫行，呢齣驚慄片未必會重演，大戶隨時趁靜市將大市舞高，故6月繼續做好友。
智能手機銷量激增
噚日推介嘅慧聰網(8292)炒高近半成，距離食糊又近咗，今日推介TCL通訊(2618)，亦有三箭頭攻堅，一樣唔嘢少。首先，TCL通訊公佈5月數據，手機及其他產品總銷量，按年增長30%，其中海外市場升29%，內地市場升35%，夠全面！公司主打嘅智能手機及智能產品，按年更勁升1.7倍，佔總銷量55%，毛利率肯定有增無減。其次，TCL通訊舊年第三季開始復蘇，喺基數較低下，可以預期嚟緊兩季會持續發盈喜，有呢個催化劑支持，後市易升難跌。最後，金手指謝清海密密增持，不足一個月掃咗24球貨，擺明不問價追，彭博綜合券商預測，今年預測市盈率10倍，點秤都值博。
唐牛
https://www.facebook.com/tongcow88
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp
唐牛
魚樂無窮 - 唐牛 舊文
