中環在線：退休生活寫意保養得宜
張永霖餐廳展歌喉
■張永霖(右)同兩位男友人似乎係餐廳常客，佢唱歌時一臉陶醉(左圖)，相當投入，亦幾有水準。
電訊盈科(008)前副主席張永霖退休多年，生活優哉悠哉，上周四晚佢就跟兩位男性朋友喺中環一間有樂隊伴奏嘅西餐廳食飯，其間歌興大發，上台大展歌喉，相當陶醉咁唱咗一首《恰似你的溫柔》。
中環擺花街有一間充滿懷舊氣氛、有菲律賓籍樂手現場演奏嘅餐廳，張永霖上周四晚大約8點現身，冇耐佢兩位朋友已經上台唱歌，其他食客認得出張永霖，亦叫佢上台唱埋一份。
唱《恰似你的溫柔》唔睇詞
張永霖最初以未食飽為由，扭擰唔肯唱，不過佢好快忍唔住，就跳上台揀咗蔡琴同鄧麗君都唱過嘅《恰似你的溫柔》去唱，見佢唔使睇歌詞，有曬台風咁唱，相當投入，亦都唱得幾好聽，肯定唔係「技安」。睇情況，呢首歌，佢應該唱咗一百幾十次。言談間，估計佢仲係呢間餐廳嘅常客㖭。
張永霖其實真係好鍾意唱歌，「公職王」鄭慕智曾經透露，佢同張永霖六十年代尾喺香港大學讀書期間，一齊加入合唱團唱歌，雖然兩人攻讀唔同嘅課程，但就因為有共同興趣而相識，並且成為好朋友。
坊間傳聞，卡拉OK喺N年前流入香港，張永霖已經喺屋企設有第一代卡拉OK設備，不時在家練歌，可見佢有幾咁鍾意唱歌。話時話，張永霖66歲仍然保養得宜，冇乜老態，唔知係咪同成日唱歌練氣有關呢？好多人寫毛筆字、畫畫，其間就係練習呼吸吐納，所以好多書法家都健康長壽㗎。
李華華
mailto:LiWaWa@AppleDaily.com
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp
LiWaWa@AppleDaily.com
中環在線 - 李華華 舊文
