中環在線：香港舞蹈團搵財團泵水
鄭志剛黃遠輝為舞聚頭
■鄭志剛(左)一向支持本地藝術，黃遠輝(中)會否說服對方做長期贊助商呢?右為新世界發展董事紀文鳳。黃偉傑攝
做緊城規會副主席嘅退休賓架黃遠輝與新世界發展(017)第三代接班人鄭志剛(Adrian)上周五晚聚首，並非為地產項目，而係為咗藝術。事關黃遠輝身兼香港舞蹈團主席，首次搵嚟新世界贊助舞蹈團節目，兩人因此一齊現身香港文化中心睇表演。
唔識跳舞嘅黃遠輝2010年開始擔任香港舞蹈團主席，坦言香港藝術組織相對慈善、環保、扶貧等其他團體，較難搵到贊助，當企業撥出資金去履行企業社會責任，未必選擇贊助藝術活動。
■將退任科技園董事局主席嘅蒲祿祺(右)對舞蹈都有興趣。 
■電影《狂舞派》監製陳心遙(左二)，唔通嚟取經睇嚇拍唔拍續集？ 帶嚟一批新觀眾
佢從事銀行業多年，了解到銀行近年向優先理財或私人銀行客戶推銷時，都會講求生活品味，以優閒生活、中產人士嘅興趣為主，例如提供試酒會，對藝術活動嘅接受程度亦較高，比較有興趣贊助藝術表演，然後邀請客戶入場欣賞節目。於是，佢多數向私人銀行、保險等金融企業埋手，呢類企業甚至可能將贊助費當作推廣費。
贊助商嘅客戶獲邀入場觀賞表演，同時可以為舞蹈團帶嚟一批首次入場嘅觀眾。黃遠輝承認，舞蹈表演比較沉悶，難吸引觀眾，唔似話劇、展覽，好多時都要係本身鍾意跳舞、有學過嘅人先至會入場。贊助商正好為舞蹈團帶嚟一批從未睇過嘅觀眾群，雙方算係互惠互利。不過，佢亦會試搵地產商等其他企業贊助。
新世界今次就係首度贊助香港舞蹈團嘅表演節目《梁祝．傳說》。鄭志剛話，公司一向支持本地藝術發展，佢亦想跟香港舞蹈團合作，只係一直未有合適嘅表演節目，今次就夾到嘞。
李華華
mailto:LiWaWa@AppleDaily.com
識睇一定睇蘋果嘅足動世盃：
http://worldcup2014.appledaily.com/
LiWaWa@AppleDaily.com
中環在線 - 李華華 舊文
