金手指：點解炒股成日輸
■筆者指出，如果你炒股成日輸，就要問是否因細個俾人鬧得太緊要，投資者諗嚇啦。資料圖片
禮拜六早上孫柏文喺電台節目《早晨八達通》，訪問人肉啤啤熊兼精神科醫生曾繁光。節目中我問，香港以前行嘅甄別人才計劃即抵壘政策，同之後主導嘅包容式政策即單程證計劃，有冇引致香港患精神病病率同國際水平唔同。
曾醫生話，根據數據冇。我又再問，香港歷年來咁多風風雨雨，例如金融風暴、沙士等，會唔會話令患精神病病人數字升同跌嘅呢？佢話百分之三患啲嚴重精神病病人當中，其實八成幾都係天生，而有百分之十五見有輕度病徵，例如焦慮、抑鬱等嘅人，先有機會受環境影響所至。
細個俾人鬧有影響？
但佢話最受後天因素影響嘅年紀，唔係當你四十出頭，孭住按揭兼被炒魷之時，而係一啲兩三歲小朋友，特別係佢哋如果喺嗰個歲數日日俾人鬧。
曾醫生話呢啲小朋友當佢哋俾人日日鬧時，會令腦部叫杏仁核amygdala嘅部位特別發達，會令佢哋對環境產生嘅現象特別敏感，結果係呢啲小朋友會好驚跳出框框。我即問：「好驚跳出框框？咪唔敢顛覆現有市場秩序？呢十幾年越來越一條龍嘅教育政策要鬥起跑線時，啲小朋友咪被鬧到佢哋成長後唔敢創業？唔怪之得佢哋話冇希望啦！」曾醫生答：「不過佢哋會做好嘅員工！」亦可能解釋點解新一代咁驚香港變，咁驚任何嘅發展。
我繼續諗，除咗創業另一要跳出框框、不隨羊群嘅活動，就係資金分配，有雲投資要眾人皆醉我獨醒。我睇過篇《華爾街日報》嘅報道，甚至話天生冇恐懼感嘅人，因能超常人咁客觀，故數據話係最top投資者。如下一代已杏仁核腫脹，點會有效分配資金呢？香港未來唔通真係靠強迫金好過信自己？我問曾醫生以前啲人點解膽大到敢偷渡，醫生話可能佢哋細個時冇俾人狂鬧。咁當呢啲老一輩嘅香港人遇上杏仁核腫脹嘅後輩時，唔怪得會互指唔明代溝啦。而你炒股成日輸，你就要問嚇係咪因細個俾人鬧得太緊要啦！
孫柏文
獨立股評人
http://facebook.com/shuen
本欄逢周二刊出
識睇一定睇蘋果嘅足動世盃：
http://worldcup2014.appledaily.com/
金手指 - 孫柏文 舊文
