老外老細
2014/6/17 上午 07:14:16
網誌分類: 經濟
美股繼續沉悶，幾乎原地踏步。杜指收市微升5點至16781點；標普500指數升2點，收報1938點；納指漲10點至4321點。
美國話考慮對伊拉克叛軍進行空襲，並考慮幫助伊拉克政府平息伊斯蘭武裝份子的叛亂。伊拉克緊張局勢升溫，歐洲股市微挫0.5%，美股早段跌一跌，午後已經收復失地。Rockwell Global Capital首席市場分析師Peter Cardillo表示，有投資者藉伊拉克局勢沽貨，但市場出現賣盤，幾乎馬上有買家承接，呢個係係造成市場今日唔上唔落的原因，也進一步反映現時市場硬淨，唔會單單因地緣政治問題而下跌。事實上，金股匯以及油價昨日都無大變動。
投資機構 Banyan Partners 策略長 Robert Pavlik 接受《CNBC》採訪時表示，伊拉克暴力衝突當然是市場的潛在外在威脅，但「目前只需將它當噪音看待。」他預計油價恐怕會因地緣政治擔憂而升至每桶112 美元，但即便到那個水準也不會讓經濟脫軌。美股漲勢只係藉伊拉克事件，暫停一下。
美國昨日公佈的經濟數據唔錯。美國6月紐約聯儲製造業指數從5月份的19.01攀升至19.28，創4年新高，遠好過市場預期的15。而美國5月工業産出增長0.6%，亦高過預期的增長0.5。不過，4月份的工業産出則由原先公佈的增長0.8%大幅下調至負0.3%。美國房屋建築商協會(NAHB)/富國銀行公佈的房地産建築商信心指數攀升至49點，也好過預期的46點以及上月的45點。不過美股未有受惠，可能係IMF將美國今年GDP增長預期由原先的2.8%下調至2%，明年則維持3%增長。
大市的觀望氣氛比較濃厚，主要係為期兩天的聯邦公開市場委員會(FOMC)的貨幣政策會議，將於今日開始。不過，市場普遍的預期係聯儲局會繼續把每月購買資産計劃再減少100億美元至350億美元。市場比較關注嘅係聯儲局對經濟的最新預測，這將直接影響利率未來的走勢。
內地昨日正式實施年內第二次定向降準，符合審慎經營要求且「三農」和小微企業貸款達到一定比例的商業銀行，將下調人民幣存款準備金率0.5個百分點。市場已證實興業、民生、招行、寧波四家銀行被納入定向降準範圍內。呢次係繼4月25日以來第二次定向降準，措施力度亦明顯加大。據長城證券測算，釋放資金的規模達到383億元。市場多啲水扶助農業及小企，當然係好事，不過，能否發揮最大效用，最重要嘅仲係資金能否去得到需要嘅人手上。
阿里巴巴美國上市之旅，繼續惹人注目。阿里昨天公佈董事局成員陣容。阿里共有九名董事，當中有四名是非執行董事，叫人有點意外嘅係，久違了嘅前特首「董伯伯」是其中四名獨立非執行董事之一。另外三人係雅虎創辦人楊致遠、高盛前副主席埃文斯、摩托羅拉副總裁郭德明。
阿里亦公佈至今年3月嘅盈利及營收據數。盈利37.1億美元，差唔多係去年嘅3倍；而營收84.4億美元，增長逾5成，當中淘寶增長32%，天貓(Tmall)增長90%。但增長仍略差過市場預期。消息公佈後，擁有接近四份之一股權嘅雅虎，股價受壓，插超過半成至34.81美元。
另外，網友myself(直升烏蠅) 問起我：「小弟現任職於一間本地中型銀行，最近來了一位坐房的高層，佢係美國讀名校，再做sales 升到高層，望落50幾歲，有次面對走過，同佢打招呼，我話：早晨李生，佢行左幾步，專登走返轉頭同我講：唔好叫我李生，叫我peter!小弟想知，佢咁講，是否要我知道他的管理模式？」
12年前我聽過一個朋友講一個差不多完全一樣的故事，後來個朋友搞到好慘痛，所以我要同你講講。呢個朋友又係在銀行打工，之前招呼慣中國人老板，後來嚟咗個外表係「黄皮白心」的老細David。新老細作風洋化，朋友見到佢好尊敬咁叫佢陳生，佢就話「唔好叫我陳生，叫我David。」朋友開始唔信鏡，繼續叫佢陳生，佢好認真咁講咗一兩次，最後朋友只能直呼老細英文名。
人好得意，講得多自已就信(所以銷售員話大話要對住自已先講三次)，直叫老細個英文名叫得多，就好似同老細好friend咁啦。放工仲一齊去飲酒，好似朋友一樣。我仲記得有一幕，我同呢個朋友食飯，佢講起拉緊一個大富豪去佢公司開戶口，如果成功就好大貢獻，我問佢有無話俾老細David知，佢話得架啦，呢個老細好似老外咁，無乜所謂，事成先至同佢講啦。
結果就咁出事啦。朋友真係拉到大富豪去佢銀行開戶口，當天下午，賣埋枝香檳，返公司在大堂中，大聲宣布佢拉到呢個大客，佢老細都係聽到咁嘈，走出房先知事。當然走過去擁抱慶祝啦，不過好快就變臉啦。當朋友以為拉到大客可以升職加人工之際，佢老細就變得樣樣話佢做錯，總之無樣啱，係咁玩佢，玩得三個月，佢自已都頂唔順閃人啦。
事後同佢傾起，朋友話最錯當正老細係無所謂的外國人，點知佢滿口英文，其實骨子裹都係中國人，你唔好同佢搶功，要尊敬佢。朋友的錯，從聽錯那一句「唔好叫我陳生，叫我David」開始，老細咁講，只係顯示佢引以為榮的老外作風，十分親民，但佢其實都係中國人，唔係外國人，受幾千年文化影響，比老外有機心。
陸羽仁
回應(3) 我想回應
陸羽仁 BLOG 舊文
