魚樂無窮：尋找下一隻優質殼股
■吳自豪任主席的信佳財政健康，市值僅5億銀，有望成為下隻爆升殼股。資料圖片
世界盃效應開始發酵，成交500億唔夠，如果捱夜睇波再炒股，包你一分鐘瞓著。幸好悶市下仍有兩大炒作概念，唔係連僅有嘅炒鬼都走埋。第一樣係AH概念股，大折讓派系如洛陽玻璃(1108)、東北電氣(042)升穿滬港通高位，但部份基本因素麻麻，炒作要貼市兼轉身快。
過四關揀信佳
第二樣係殼股尋寶潮，英發(439)及景福(280)喪升一倍及四成，快過印銀紙。早排推介嘅豪特保健(6880)炒高一成，喺一蚊樓下撈貨嘅戰友，不妨先食一半，有利潤在手，坐都坐得穩陣啲。今日推介另一隻潛在殼股前，不厭其煩再講賣殼四大條件︰業務簡單、股權集中、市值細小、財政良好。信佳(912)主要從事電子產品研發、製造及銷售，包括寵物培訓器材、專業音響設備及互動教育產品，業務夠簡單，先過第一關。大股東與相關人士持股逾六成，股權夠集中，再過一關。公司市值僅5億銀，入主成本便宜，又過一關。最新業績顯示，手頭淨現金達1.4億銀，兼且年年派高息，財務狀況健康到暈，成功過曬四關；有幸被相中的話，升幅隨時以倍計，乃小注博大贏佳品。
唐牛周日facebook即場推介厄瓜多爾下盤，補時階段被踢爆，認真唔抵。今日要收復失地，唯有向皇者巴西埋手，原因一句講曬︰有主場之利，今晚對墨西哥讓球盤雖然好辣(讓一球/球半，1.73倍)，但冇計，照捧上盤！
唐牛
https://www.facebook.com/tongcow88
【622公投我撐普選】毅行直播
流動版網頁:
http://622popvote.appledaily.com
唐牛
魚樂無窮 - 唐牛 舊文
