中環在線：
定價照舊$485料袋2,900萬
嘉麟樓奶月收益唔捐出
■創製奶黃月餅嘅葉永華師傅(左)現為半島集團點心大使，與嘉麟樓點心部主管方利興合作無間。
現時過節食品市場嘅競爭都幾激烈，大家食完糭冇耐，市面上最近已經有月餅上架，每年都有人爭住買嘅半島酒店嘉麟樓奶黃月餅，今個月初仲已經開始咗部份客戶優先訂購，今年售價同舊年一樣，每盒485元，不過半島舊年將部份收益捐去幾個慈善機構，今年就冇呢支歌仔唱，收益全部袋曬。
嘉麟樓奶黃月餅一向都係政商界名人嘅送禮選擇，名氣大自然吸引有錢又要面嘅強國人搶購，前年開售引起混亂仲要搵警察調停，結果半島舊年將月餅大幅加價九成，至每盒485元，又跟五個慈善機構合作，將其中17%收益捐出。今年，嘉麟樓月餅冇調整價格，不過亦唔會特別將收益作慈善用途。
■何倍倩打算訂幾十盒嘉麟樓月餅送禮。 
■麥玲玲鬧嘉麟樓網購遇擠塞唔方便。 何倍倩：訂幾十盒送禮
半島發言人強調，半島會繼續向其他慈善團體捐款，只係冇特別從月餅收入撥出捐款。嘉麟樓舊年賣出6萬盒月餅，粗略計算，月餅收入總額超過2,900萬元。半島所屬嘅大酒店(045)，舊年營業額55億元，月餅當然只係一個極細數目。
持有運通半島卡嘅客戶本月初至7月中可以訂購，每人限購30盒，8月4至8日就公開網上訂購，每次可訂20盒。
「恒生新抱」何倍倩由細食嘉麟樓月餅食到大，佢話，由於生產量有限，感覺嘉麟樓月餅好珍貴，雖然難訂，即使熟客都冇人情講，佢今年依然打算訂幾十盒送禮。堪輿學家麥玲玲師傅鬧嘉麟樓要人上網訂購，遇上網絡擠塞好唔方便，但係都會因對方名氣而繼續捧場。
李華華
mailto:LiWaWa@AppleDaily.com
【622公投我撐普選】毅行直播
流動版網頁:
http://622popvote.appledaily.com
LiWaWa@AppleDaily.com
中環在線 - 李華華 舊文
