異動空間：三折股票任買？
魚缸靜如止水，繼續睇波等運到。恒指半年內第三次出現「死亡交叉」，即10日線跌穿20日線，雖屬滯後指標，但亦頗具指標性。之前兩次警報後，恒指起碼再隊500點先見底，加上細價股率先洗倉，短線指數易跌難升。不過，半年結前新股蜂擁招股，投行為咗生意，點都頂住條指數，以免「親生仔」夭折，跌唔落可能只是假象。
蠟筆小新(1262)復牌暴瀉32%，高位唔見七成，有戰友問撈唔撈得？買衫打個三折畀你，你都會望真啲件衫，睇嚇有冇穿窿，甚至質疑件衫係咪A貨；三折股票任你買，有冇咁大隻蛤乸？再諗，6蚊跌落嚟，未止蝕的散戶會在2蚊沽貨嗎？掟貨多為基金大戶，仲要由頭質到落尾，明顯仲未出完貨。淨係望咗份復牌通告就清兵上身，勝算有幾高？執平貨時跟自己講「人棄我取」，別人恐慌時我貪婪，只是以自己血汗錢，為沽貨者送上逃生門。
中國燃氣(384)業績省鏡，純利按年大升46%，股價昨率先破頂，成交配合急增，但最近PE仍達26倍，股息率唔夠1厘，加上MACD及RSI均現頂背馳，當心隨時業績見光死，回到13蚊樓下再考慮。
魏力
http://www.facebook.com/2012jason
魏力
~TITLE_S~異動空間 - 魏力 2014年6月26日 舊文
