中環在線：兩大燈神唔怕俾人笑
LuLu愛燈因為有話題
■孫柏文同大埔LuLu對於明燈稱號同樣睇得開。 
球壇與股壇兩大「明燈」相遇會係點樣呢？大埔LuLu(董嘉儀)跟孫柏文噚日因一個訪問而碰面，兩盞明燈難得聚頭，當然要比較邊個「燈」啲，實情係兩人不相伯仲，兩人嘅共通點係睇得開，唔怕俾人笑，LuLu直情將佢由負面變成正面，指明燈之說幫佢製造好多話題㖭。
世界盃之前，LuLu已經被人話係明燈，開波之後更加係燈到冇朋友，直至德國對葡萄牙一場先至成功破燈，之後佢嘅預測有準有唔準喇。年紀輕輕，今年8月生日先至21歲嘅LuLu竟然相當豁達，曾經喺自己facebook留言，叫大家唔使咁serious。
儲錢買樓目標600呎單位
噚日佢再解釋，對於明燈呢個朵，佢冇話介唔介意，反而覺得大家幫佢製造咗好多話題。佢坦言，初出道時會因為被網友起底、乜都負評而唔開心，但係經過同事開解，知道做模特兒、藝人呢行，心理狀況要相當好，自己亦慢慢睇開咗。
佢𠵱家將收入交畀媽媽，媽媽同佢都冇投資股票，皆因佢膽小，寧願慢慢儲錢，希望可以喺3至5年內儲到一筆首期，喺新界區買番一個大約400萬元、600至700方呎嘅單位，令一家四口(除爸媽，佢有一位靚仔哥哥)可以由公屋搬去私樓住，改善生活環境。
孫柏文見到LuLu就笑住拋低一句「長江後浪推前浪」。佢知道自己燈，已經好少貼股票，費事開口中，但真係貼親都出事，今年3月佢叫人不問價追信達(1359)，文章見報前一日信達報4.35元，5月低見3.6元，噚日收3.8元。上月佢叫人買中慧(1143)，見報前一日中慧收0.901元，噚日收0.74元，都咪話唔邪。
孫柏文好樂觀咁話，網民早期叫佢「黑氣石」，之後變成明燈正面好多，佢已經好開心。不過，始終冇人鍾意被人叫明燈，佢見個市唔配合都會避開，盡量唔貼股咁話。
李華華
mailto:LiWaWa@AppleDaily.com
LiWaWa@AppleDaily.com
中環在線 - 李華華 舊文
