內房股王駕到
2014年06月26日
投資者近日講波多過講股，世界盃首圈循環，不少球迷輸到七彩，皆因心儀球隊英格蘭、西班牙先後出局，連意大利都「臨尾香」。強隊紛紛爆冷玩完，中環茶友就話根本一啲都唔冷，好似西班牙，佢哋的皇家馬德里同馬德里體育會兩個同城宿敵，在歐聯決賽踢到殘。另外翻睇紀錄，過去只有一次歐洲國家可以係美洲舉行的賽事贏到世界盃，歐洲佬怕熱也。
炎夏炒股 慎防中暑
不過陸羽仁同意一點，就係無論做乜都好，都要睇大氣候，好似呢排個股市特別翳焗，皆因外圍美國經濟升溫，令美息始終有向上壓力。好似美國最新公佈的樓市數據，就顯示資產價格上升，所以無論聯儲局主席耶倫點講都好，市場都仲係睇緊美國會唔會係明年初就提早加息。要留意的是6月消費者信心增幅超預期，5月新屋銷售漲幅同樣唔差，反映經濟正在升溫，對香港樓市、股市嚟講，就有小小似南美洲天氣，好易會就會中暑。
大市悶跌13點，收市後政府公佈馬鞍山地招標結果，由宏安集團(1222) 擊敗17組財團，以超過7億元奪得，每方呎樓面地價約3515元，成交價符合市場預期，再次證明?家中小地產商投地勇過大財團。個市回少少，股民就想郁手，例如有人留意開中國海外(688) ，話跌咗啲好唔好?家買，我叫大家忍一忍先，一則中海外插得未夠深，二則中國第一大地產股萬科(2202) 嚟咗香港上市，大家有無留意呀？
萬科以B轉H股的方式，昨日在港上市，首日交易中上升，佢B股一周前在內退市前最後收盤報價為12.41港元，昨日該公司股票開盤報13.66港元，然後回吐橫行，收13.28元，比B股退場時升了7%，H股進出容易，流通量比內地B股高，在港較受歡迎亦好正常。
萬科上場 中海失色
多家大行睇好萬科H股，花旗首予萬科H股「買入」評級目標價19.07元。摩通亦俾萬科「增持」評級，目標價15元。里昂把萬科H股目標價由16元上調至17.4元，投資評級為「買入」，里昂話相對中國海外，萬科企業的規模更大，估值便宜，以市盈率及派息率比較，均較中海外吸引。
大家應要知道，在萬科來港前，中國海外是最有實力和最好的內房股，但萬科是全國第一，排在中國海外之前，所以萬科這隻內房股王來港之後，難免搶了中海外的注意力，中海外昨日跌了1.5%，收18.86元，跌幅多過其他內房，估計有基金沽佢買萬科。中海外現價6.7倍市盈率，萬科現價7.6倍，但萬科一到，中海外失色少少。我建議若個市差少少萬科回吐時，去到12.4元(B股退市時價位)，可以慢慢吸納萬科。佢係真正行業龍頭，競爭力強，以7倍市盈率買入，有長線投資價值。
另外，呢排美國熱炒股份之一係做電動車的TELSA，佢由200美元邊爆上接近240美元，所以同一概念的內地影子股比亞迪(1211) 呢排都有向上趨勢。TELSA為了做大電能車個餅，決定開放多項專利，以推動產業發展，呢招係咪可以谷起電能車市場仲未知，但就谷起咗佢自己的股價。
比亞迪今年高價造過56.95元，但5月時以每股35元，配售7.93億股H股，集資42.67億元，配售價較停牌前報41.15元大折讓15%，股價即時碌番落去，但佢時來運到，撞正美國同類領袖股有動作，股價反覆走番上咗，昨日收報44.7元，比配股價有28%升幅。不過，TELSA係美國升咁多，獲利壓力應該唔小，小心呢隻美國電動車王回吐時，拖番比亞迪都回吓。
陸羽仁
金融High Tea 舊文
