魚樂無窮：利信達無懼零售寒風
■劉舜慧任行政總裁的利信達三年前已經向電子商貿埋手，早著先鞭。資料圖片
本地零售股江河日下，並非一朝一夕的事，租金及人工高企，早已成為無形魔爪，如今政府再拋出削減自由行數目嘅方案，加上中港矛盾日深，彷彿在傷口上灑鹽。不過，從另一角度睇，可加速板塊見底，長遠來說絕非壞事。
雖然行業正處寒冬，但當中不乏逆市奇葩，利信達(738)肯定係箇中表表者。因出售貨倉及車位錄得特殊收益，公司去年純利大升60.3%至2.87億銀，就算撇除相關收益，核心純利仍升21.1%至1.85億銀，毛利率更上升2.4個百分點至67.1%，表現拋離同業幾條街。點解可以咁靚仔？主因公司背靠祖國，成功食正強國人條水，從內地溢利佔比達九成可見一斑，故自由行人數多寡，對其影響甚微。公司於三年前向電子商貿埋手，早著先鞭，去年電商業務收益按年狂升逾倍，將O2O優勢盡情發揮。
成功突破橫行區
業績交足貨，派息當然唔手軟，利信達連特別息共派27仙，息率接近七厘，就算撇除特別息因素，回報亦有四厘，吸引力十足，手頭淨現金達7億銀，相當於市值近三成，含金量極高。
本欄早於去年反覆推介利信達，設中線目標價4蚊，本周正式達標。睇圖表，公司已成功在持續半年嘅橫行區上企穩，trading range正式上移，現價市盈率13.6倍，兼且增長力度維持，故可將目標價調升至4.4元，戰友可候回試3.8元吸納，潛在升幅16%。
唐牛
https://www.facebook.com/tongcow88
【壹錘定音】星期一至五，早上8點開咪！
http://hk.apple.nextmedia.com/livestream/channel/lishow
立即更新Android《蘋果動新聞》app
https://bitly.com/appledailyandroidapp
唐牛
魚樂無窮 - 唐牛 舊文
