中環在線：康宏主席與同事巴西睇波
王利民買中世盃假飛
■真假門票分別不大，只係貨幣唔同，睇真啲，真嗰張中間係有堆數目字。
■王利民跟同事去巴西睇世盃，竟遇不快事。 跑過撒哈拉同北極馬拉松嘅康宏(1019)主席王利民最近飛去巴西睇世界盃又有奇遇，不過係唔愉快嘅遭遇。話說佢跟同事一行17人飛去巴西玩，其中一個行程係入場睇前晚阿根廷對荷蘭嘅世界盃賽事，點知入場時被發現有4張門票係假，王利民入到場，有4人就敗興而歸。
康宏為獎勵表現優秀嘅同事，斥資過百萬元(每人團費超過10萬元)，請佢哋到巴西8天遊，佢哋可自費帶埋親友去，連埋王利民，一行17人本周一出發，前晚原本高高興興準備入場睇阿荷大戰，點知拎住啲飛去到球場門口，被保安扣留咗大概20分鐘，保安返嚟就話畀佢哋知有4張假飛，其他人可以入場，4人冇得入。
與太古旅遊斟賠償
佢哋呢個旅行團係幫襯太古旅遊，太古旅遊透過公關確認有呢件事發生，領隊將按照守則喺當地報案，全部門票都係向同一門票代理商購買，暫時都唔清楚出現假飛嘅原因，太古旅遊正等候代理商回覆，作進一步跟進。
單靠肉眼睇，真假門票分別不大，只係貨幣唔同，真嗰張，中間亦有堆數目字，唔認真睇未必留意到。王利民話，佢哋都冇諗過手持假飛，冇特別比較每張門票，被人扣留之後，假門票亦被充公，所以根本冇辦法自己再去分辨真偽。
其實王利民原本手持假飛，入場前有同事想跟佢調位，反而換走咗佢張假飛，佢同事當然傷心到死。
聽聞，佢哋𠵱家仲跟太古旅遊傾緊賠償，不過點樣賠，應該都彌補唔到一場世界盃四強賽事啦。
李華華
mailto:[emailprotected]
[emailprotected]
中環在線 - 李華華 舊文
