放寬限購只炒新股
2014年07月11日
雖然有資金流入香港，但數量暫時唔多，恒指反彈力度相當有限。外圍杜指上日升78點，恒生指數高開105點報23281點，但隨住內地外貿數據差，升勢放緩至6點，後重拾動力，恒生指數收報23238點，升62點，成交縮至476億元。以巴衝突升級，雙方互轟導致平民死傷，推高國際油價，歐股開市下跌，夜期早段跌近200點，守住23000點邊位。港股正在回吐格局中，以成交睇無乜力，但係唔係再跌，都要睇美股點走。
葡國銀行又出事
葡國最大上市銀行停牌觸發歐美股市下跌。葡萄牙證券監管機構下令暫停當地最大上市銀行聖埃斯皮里圖銀行(Banco Espirito Santo)股份買賣，原因是投資者對銀行母公司的財務狀況憂慮加劇。停牌前，聖埃斯皮里圖股價急跌近20%。
銀行母公司已押後支付部份短期債券的利息。有關集團5月底時被發現會計違規。受到消息影響，歐美股市曾跌1%或以上，隨後跌幅略為收窄。葡萄牙10年期國債息率升穿4%。
鬆綁消息刺激有限
新華社證實，濟南市實行3年多的商品房限購政策今天起正式取消。濟南居民今後購買新建商品住宅和二手樓，不需要開限購證明。
過去咁多年，內地樓市打極都打唔落，仲愈打愈升，說到底係因為錢太多，四周圍搵嘢炒，所以呢個城市限購，炒家就去另一個城市炒，炒完大城市就炒二、三線，搞到中央頭都大。不過，當中央收緊銀根，喺源頭截住熱錢，炒家無晒彈藥，炒風終於無以為繼。
當中央打壓樓市最嚴厲時，好多房地產商將焦點轉晒去三、四線地區，初時炒風好勁呢招仲得，但賣賣吓就無以為繼，好多內房商因此走番轉頭，寧願俾多啲錢買番大城市，結果令到一線城市地價上番新高，市場兩極化現象日益明顯，家二、三線城市放鬆了調控，但係咪代表市況要生番，仲要睇市場反應，而內房股昨日無乜動靜，如果想買內房股博反彈，暫時仲係留意住龍頭股同土地儲備係大城市為主的內房股，起碼股價較穩陣，龍頭股萬科(2202) 同中海外(688) 會穩少少，中海外公佈，集團6月合約物業銷售金額約為169.7億元，樓面面積約為118萬平方米，估計內房股無條件全面造好，加上龍頭股升咗上去，做吓塘邊鶴齋睇好啲。
新上市的內房股中國新城市(1321) ，收報1.57元，仍較招股價高0.27元或21%。
該公司為商用物業發展商及營運商，專門於長江三角洲地區的二線城市經營。內房新股普遍表現平平，呢隻新城市借勢炒一吓，算係揀啱時間出世啦。
除咗賣樓股外，聽在內地做生意的中環茶友講，近日返到內地商場，見到市況真係幾唔靚仔。早兩年有些香港發展商殺去二、三線城市起豪華商場，家落成開始做生意，撞正內地打擊豪奢風，大大檔攤變成四野無人，都幾得人驚。
國務院總理李克強主持召開國務院常務會議，決定從今年9月1日起至2017年年底，對獲得許可在內地銷售的三類新能源汽車免徵車輛購置稅，比亞迪(1211) 應聲彈出，收報46.55元，揚3%；汽車充電設備製造商泰坦(2188) 股價漲2%，造1.05元，似乎概念仲未玩完。
陸羽仁
金融High Tea 舊文
