出閘快放
2014年07月03日
美股勁升，創新高之餘仲只差4點就衝破17000關口，加上港元呈強勢，解釋係有資金因為派息或收購流入，令到港股喺下半年第一個交易日就大升。有人笑言唔通七一佔中無爆大鑊，炒鬼想把握時間食快餐，所以唔等世界盃完結就嚟料？
美股升到咁高，搞到全球基金經理無心睡眠，因為家股又貴、債又貴，持有的基金家唔知買乜。有啲基金今年上半年起開始睇好番歐洲股市，認為歐股仲有得升，反而佢哋有啲擔心債息唔知見底未，想沽債減磅買番啲股票，港股勝在唔係貴，心理上無咁大包袱。所以開季有啲外國芬佬買盤，唔係好奇。佢哋在年結、半年結前窒住怕多做多錯，過完結算日就大膽少少買貨。
有中環茶友話，歐洲股去年買就真係幾平，家升咗唔少，價錢雖然唔貴，但都有小小畏高，如果話買歐洲股，點解唔買和黃(013) 呢？因為和黃早兩年係歐洲執咗唔少平貨，而且佢手頭大把子彈，如果睇好歐股，不如買和黃仲好啦！
半年結後芬佬出手
茶友呢個講法，可能或多或少解釋咗點解呢排和黃股價比起其他本地股價強，佢昨日又創一年新高。家要買佢，最大挑戰係佢已經升咗唔少，要係咁嘅水位撲落去，都要有多少膽識至得!
睇番昨日個市，其實升嘅好多都係強勢股，除咗長實(001) 同和黃外，仲有太古(019) 、騰訊(700) 等。美股家創緊新高，加上港元強勢，金管局解釋話係國企要派息，故此調錢入嚟，咁即係話同股市有關啦，喺幾個有利消息配合下，下半年開市來個出閘快放，成功搶咗市場眼球，唔排除呢一兩日仲有機會掃多浸。
受惠資金回流本港，金管局連番向市場注資，加上內地放寬存貸比率，市場料最多將釋放出8000億，配合內地製造業PMI回升至51之上，恒生指數全日飆逾350點，上破兩萬三千五，創今年收市新高，成交增至超過733億元。恒生指數收23549點，升358點；國企指數收報10448點，升113點，成交大幅增加至733億元。
除咗騰訊，匯控(005) 都做咗升市火車頭，兩股合力拉高恒指139點。匯控收報80元，升1.8%，以佢嚟講算係叻㗎喇。銀行業生意難做，但大笨象都叫做有歐洲復甦概念，最緊要係股價無乜獲利盤，引人沽貨的誘因唔係咁大，如果手頭有貨，似乎可以睇多陣。
落地喊三聲，好醜命生成，上個星期好多新股掛牌，不少冷門新股都破底，但見到家氣氛好轉，外電報道社交視頻平台天鴿互動(1980) 擬以近上限定價，招股價介乎4.5元至5.3元，以發售3.04億股計，集資16億元。另一隻內地手機零售商北京迪信通(6188) 擬以5.3元定價，介乎招股價範圍5.3至7.1元的下限，發售1.67億股H股，集資8.833億元，個市升佢又大平賣，點講都好過先前掛牌的環境啦。
內地新股突然好好炒
要留意係滬深股市早段本來好淡爭持，午後反覆靠穩，上證指數更以近全日高位收市。除了航天軍工股逆市爆上，煤炭股午後造好，最「養眼」係新股繼續熱炒，今日三隻新股上市，再次開市即迅速漲停，內地之前聽到新股重啟就腳都軟，但一輪招股掛牌活動後，市場又炒到癲，搞到香港新股表現相形見絀，相當無面。若果從相反理論或物極必反的思維去諗，由於好多掛牌股價跌到散戶損手爛腳，話唔定炒家會從中尋寶，走番一程超快短線都話唔定。
陸羽仁
金融High Tea 舊文
