股場放大鏡：意科做足工夫等賣盤
意科控股(943)上周五出現近年少見的超大成交量，呢隻股仔大有留意價值。意科今年5月公佈股份10合1及大比例1供16，集資約2.5億元，呢單供股留意大股東並沒有供股，故供股僅獲70.7%認購，大股東持股由11.47%降至0.67%。不足之供股部份由包銷商負責，包銷商持股由零增至27.56%，整單集資頗有借大規模供股攤薄大股東權益並將股份歸邊的味道。
現價低殘值博率高
公司早前公佈之業績營業額僅8,000多萬元，主要來自保健及家庭用品製造業務，毛利1,870萬元及純利3,317萬元，包括入可換股債券之公允值收益，是公司單一收入來源，隨時可以將之出售。至於海外煤礦資產尚未開始開採，呢部份業務亦係可以隨時終止之業務。供股完成後該公司淨持現金2.66億元，而其市值也是2.59億元，即每股現金約0.47元，同現股價差不多，睇完盤數，大概估計得到整單供股是為了部署賣盤而進行的一連串財技，包銷商成為大股東後當然無意造好盤製造業業務，而係一買一賣的簡單交易，低買高沽。
因意科每股現金量已達0.47元，現價如此低殘是股份因供股嚇怕股東超跌所致，呢個價買可以稱得上無得輸，因淨現金外還有淨殼價，即使賣盤不成亦無損失。呢隻股自2月高位大跌99.7%，非常誇張，玩呢類無厘頭三四線股高追不宜，但跌到呢個位downside protection已非常足夠，卻又不妨買少少玩嚇，博中賣盤的話回報至少以倍計。
歐陽風
歐陽風
股場放大鏡 - 歐陽風 舊文
