裸泳
2014/10/17 8:39:2
網誌分類: 經濟
美國最新出爐嘅就業數據及工業產出數據雖然靚仔，又有聯儲局主要官員提出聯儲應該考慮延後結束買債計劃，以阻止通脹預期下行。但近期跌得咁勁嘅美股，昨日只係嚟一個「死貓彈」，收復了上午嘅200幾點跌幅，已經無力再上，尾市更再度回軟，尋底味道濃厚。杜指收市跌26點至16117點；標普500指數平手離場，收報1863點；納指微漲2點，收報4217點。
美國最近一周首次申請失業救濟人數減少23000人至26.4萬，總數為2000年4月以來最低，也低過市場預期的28.9萬人，而四周移動平均人數減少4250人，降至28.35萬。
另外，美國9月工業産出較上月升1%，遠好過市場預期的0.4%這主要得益於公用事業的産出大幅增長。1%的漲幅明顯超過接受MW調查的經濟學家平均預期的0.4%。當中公用事業産出升幅顯著，較上月大漲3.9%，礦業産出亦升1.8%，第3季度工業産出的年化增長率則較上季增長3.2%。不過，高盛分析師基於9月份美國零售數據及8月份企業庫存數據，都不及預期，發報告下調美國今年第三季GDP增長預期，由3.5%下調至3.2%，第四季則由3.25%下調至3%。
杜指昨日朝早再次失守16000點大關，其後可以扳回，主要係受聯儲局官員的「鴿派」言論推動。「鴿派」官員講「鴿派」說話，當然無甚特別。不過今次令市場提提神嘅係一向被視為「鷹派」嘅聖路易斯聯儲主席布拉德，居然呼籲儲局實施QE4，佢昨日話儲局應該考慮延後結束債券購買項目，以阻止通脹預期下行。他表示美國經濟基本面仍強勁，股市出現動蕩的原因係歐洲經濟前景惡化。儲局的原定目標是在10月底結束QE3，但布拉德指出，結束QE與否的決定應該基於數據，而通脹預期正在下行，「或許現在需要基於數據來做決定。」布拉德的轉軑言論，令大市有番一定的支撐力。
我此前提過，唔少市場分析員測市時，都有一個習性，見好唱好，見淡唱淡，預測總係跟住大市尾巴走。野村證券策略師簡尤(Bob Janjuah) 昨日認為，標普500指數11月末前可能會由高位重挫20%至1600點。他指標普下一個支撐位將是1770點。簡尤的理據係QE結束。佢提醒投資者，「當QE1結束後，標普約在3個月內跌了近20%，之後QE2讓股市復甦；當QE2結束後，標普又在3個月內下跌了20%，之後又反彈，QE3今個月結束，從高位三個月內下跌20%，意味着11月底前會降至1600點。」
至於股神巴菲特對於近期嘅跌市點睇呢？佢當然有買股啦。佢昨日對CNBC話，「我喜歡在股市下跌時買股，大市愈跌得多，我愈喜歡買。」股神嘅講法，係佢嘅投資名句：「別人貪婪時恐懼，別人恐懼時貪婪？」嘅延伸。對於長線投資，甚至會將投資看作退休金的投資者，股神另一句名言：只有在潮退之後，你才會發現誰在裸泳(Only when the tide goes out do you discover who"s been swimming naked.)，更值得參詳。因為最長線投資者唔應該嘗試猜測市場對於某項投資的「想法」。你估中了，當然賺錢，但這始終涉及不可避免的風險：估錯了而輸更多錢。
這就像賭博一樣，當你輸了錢，想急急加注想翻本，結果往往係連剩低嘅錢都輸埋。這是一個數學的陷阱，假設你的投資輸了10%，你需要的是11%嘅贏錢機會才能翻本，而不是10%。例如你有一項10元的投資，輸了10%，手上剩下9元，你揸住佢唔鬱，遲些佢可能升番。但如果你沽出咗，再買另外一項投資，即使反彈10%，你只能夠拿回9.9元，該項投資實際需要升11%，你才算翻本。即使真係咁好彩升11%，但計埋出入手續費，你仍然得不嘗失。
好多散戶在市場底部沽貨，一般而言都好難翻到本。例如10元的投資蝕了50%沽了貨，重新投資，即使該項投資升番50%，所得還是只有7.5元，要回本的話，要升足100%。所以，對於不是中短炒的投資者，股神嘅「裸泳」概念，更有意義。事實上，如果你唔係基金經理，你毋須憂慮股票短期的走勢。他們之所以擔心，原因係職業嘅關係，如果他的測市有問題，便會有嚴重後果，包括得失客戶、損失傭金，無face、甚至無得撈。
長線投資者則可以學學股神，見到大市跌得咁上下，股價比較低，就可以買貨，然後長揸。大市會唔會再冧？機會當然有，出現特大股災？亦唔可以完全排除。但睇番過去，大市經歷科網股爆破、2008年金融海嘯，還不是好地地？唔少股票仲高過以前啦。當然，你要長揸的股票要係一個比較合理分配的資產組合，唔可以係當時灸手可熱嘅貴價股啦。股市走勢就如大海潮汐漲退，升跌交替，跌市其實毋須過份擔心，當然，如果你因太過搏命，泳褲已經給大浪捲走的話，另當別論。
陸羽仁
回應(2) 我想回應
陸羽仁 BLOG 舊文
