食品股 唔易玩
2014年10月22日
大市觀望四中全會同佔中發展，股民炒作半新股，藍籌股就個別發展。受到母公司旗下頂新製油前董事長被台北地檢署依詐欺、偽造文書、違反「食品安全衛生管理法」等罪遭起訴，康師傅(322) 跌咗2.4%，成為表現最差藍籌。台灣黑心油事件爆發不斷，慢慢發展為抵制頂新的社會運動，事態點樣發展仲未有定局，事件都反映咗食品股嘅食品安全風險，絕不能掉以輕心。
台灣黑心油事件風波不斷，最新又被發現用咗餿水油嚟提煉食油，由於頂新再度出事，搞到朝野震怒，民間仲發起抵制佢哋嘅其他食品，風波有擴大之勢，搞到同佢有關的康師傅跌完又跌，以佢今年高位24元計，家已經失去四分一市值，等如唔見咗近三百億市值，都咪話唔犀利。
康師傅連番插
本來只係食油出事，損失只係有限，康師傅跌得咁緊要，似乎有啲過份。今次佢搞到咁大件事，成因肯定好複雜，內裏肯定有行業陃習難改嘅因素，同時管理層應對不擅，亦唔排除有人乘機落井下石，插多兩刀。
以康師傅咁大間企業，平時應該打通晒任督二脈，練習神功防止被人攻擊，點解今次搞到好似無人護航，任人當社會運動咁搞呢？
嚴格而言，康師傅主要市場係內地，受衝擊比較間接。不過，要留意嘅係佢雖然跌咗落嚟，市盈率仍然有34倍，加上內地有通縮陰影，所以喺事件發展未明朗前，想低撈者要小心。
過去，食品股被視為係民生生意，無論經濟好壞，大家都要食飯瞓覺，令呢類股份享有較高估值。不過，近年好多事件顯示，食品安全好易變成社會事件，甚至政治化，對公司生意可以造成相當嚴重同長遠嘅影響，甚至美式跨國巨企都走唔甩，被呢類風波影響，所以呢類公司仲值唔值以往咁高估值，係另一個值得思考嘅問題。
內地第三季GDP按年增長7.3%，叫做好過市場預期，卻是自2009年首季以來最慢，令港股全日好淡拉鋸，全日最終微升，險守兩萬三大關，國企指數則要倒跌收市。恒生指數收報23088點，升18點；國企指數收報10275點，跌19點，成交縮至525億元。
內地公佈《國務院關於加快發展體育產業促進體育消費的若干意見》，把全民健身上升為國家戰略，力爭到2025年，體育產業總規模超過5萬億元人民幣，加上美國Reebok獲高價收購。體育用品股大致向上。李寧(2331) 揚1.5%，造4.06元；361度(1361) 更升咗5.2%。
半新股傳火棒
呢兩日無新股掛牌，炒家目標覷準半新股落手，上周五以介紹形式上市的民生珠寶(1466) ，收報1.13元，勁升43%，升幅是港股最勁；細細粒嘅股仔強泰環保(1395) 抽升25%，造1.4元；三和建築(3822) 都炒上9%，造1.57元；中廣核美亞(1811) 再升11.9%，報2.54元，創上市新高；上咗市較耐嘅都市麗人(2298) 升6.5%。不過，有人歡喜有人愁，配售上市炒爆嘅創業股壹照明(8222) 就大力跌落地，再插14.9%，唔知幾時先至止到瀉。
呢啲半新股炒到色香味俱全，一招就係炒供求，佢哋好多都係市值好細嘅公司，而且上市時超額倍數多，無乜蟹貨之餘，股民容易食過翻尋味，所以都唔使點講基本因素，總之信者得利，大家玩吓音樂椅傳吓火棒，呢個其實亦都係藍籌同實力股份無得玩，市底唔係咁好嘅另一種表現！
陸羽仁
金融High Tea 舊文
