短炒避開巡視股
2014年11月20日
港股昨日繼續調整，美國股市偏穩，但A股回氣。呢個時候有消息傳出，中紀委短期會落去一批國企巡視。
現屆政府對維持黨紀絕不手軟，中字派股份受壓，可能都同呢個消息有關。
中國有消息話，負責黨內紀律嘅常委王岐山指出，巡查要實現全覆蓋，仲話要用創新方式，要用專項重點巡視，有時仲要對已巡視過嘅企業殺個回馬槍，強化震懾效果，又話要機動靈活，聽落有殺氣騰騰嘅感覺。
第三輪名單揭盅
中央仲公佈咗2014年第三輪巡視名單，將對文化部、環保部、中國科協、全國工商聯、中國國際廣播電台、南方航空、中國船舶、中國聯通、中國海運、華電集團、東風汽車、神華集團同中石化等13個單位作專項巡視。
由於呢啲單位部份在港上市或有附屬公司上市，在巡查期間可以話係政治或人事敏感時期，如無特別必要，想短炒嘅話自然係避一避風頭穩陣啲。
能源股被睇淡加上呢個消息，神華(1088) 昨日就跌咗2%，跑輸一眾國指成份股。
由於本來強勢的A股都開始調整，港股昨日跌穿20天線(23689點)後力反彈，恒指最終連跌三日，昨收報23373點，跌155點；國指收報10380點，跌45點，成交縮減至651億元。
滬港通表現差過預期，南下資金尤其冷淡，昨日港股通配額幾乎無郁，搞到港交所(388) 跌穿170元關，昨收報168元，挫3.4%，為表現最曳藍籌，而且成交高達35億元，睇嚟好多股民諗住佢升咗咁多，都係掟貨收錢先。
我之前都唔太睇好滬港通面世，怕好消息出貨，但仍有唔少朋友唔信邪高追，188、189呢啲高位都有人入，我建議輸10%都要止蝕。
莎莎績弱不利零售
莎莎(178) 公佈業績，截至9月底止中期股東應佔盈利3.4億元，按年減少5%，派中期息5仙及特別股息4仙。績後瑞信睇淡該股，維持「跑輸大市」評級，睇嚟零售股都係要捱吓。
香港電視(1137) 昨日開台，尾市沽盤增加，收報4.3元，跌7%。電訊魔童轉戰電視，至今差不多三年未攞到牌，但佢其志可嘉，想搞網上電視加網購翻生。
今次開台先係播出拍出劇集。喺開幕儀式上，幫佢拍劇嘅廖啟智就叫佢快啲再拍劇，仲爆佢?家唔係咁勇。
智叔係藝人，一心想拍劇，唔知做生意燒錢好易，可能佢覺得魔童揸住幾十億好多，但講到搞電視，港台話要起個新大樓都要60億，就算私人公司慳啲，無10、20億元落唔到樓，但係香港市場有幾大先？講嚟講去都係700幾萬人，若然無得北上，條數無可能計得掂。
?家魔童變招搞網購，但做網購投入一樣唔少，淨係物流已經有排使錢，何況?家香港仲話好缺基層工人，司機人工動輒話過兩萬，魔童係密底算盤，梗係明白錢唔可以亂使，所以就算俾智叔窒兩句，佢都係咁話啦！
今個星期股仔炒到癲晒，超冷股仔坪山茶業(364) 中途停牌，之前報0.117元，漲86%，成交額1.58億元。
不過，唔係個個咁好彩，JC Group(8326) 突遭洗倉，全日先升後重創，收報1.95元，狂瀉66%，成交增至2.55億元，炒股仔分分鐘要有跳車準備呀！
陸羽仁
金融High Tea 舊文
