港視單嘢好易香
2014年11月07日
即將開台的香港電視(1137) 與騰訊(700) 旗下騰訊視頻，簽訂網上播放權的獨家協議，由騰訊視頻在內地播港視的劇。受消息沖喜，港視開市抽升，最高見5元，全日收報4.77元，大升29%，鑊氣甚濃。
港視老闆魔童又有衝勁又有橋，經常諗到計刺激大家眼球。港視拍劇，借騰訊打入內地，呢條橋又係幾得。不過咁啱我路過地鐵見到港視11月19日開台廣告，大大隻字「來生不做香港人」，仲有個示威畫面，呢啲劇在香港完全無嘢，但以內地尺度計卻相當激，加上早前港視因為攞牌事件和特區政府撐到咁行，心諗阿爺真係咁寬宏大量？
唔信邪去問吓，知情人士話係騰訊自己搞，阿爺不知情。但事件昨日曝光後，上面的部門急急腳走去睇睇。佢話內地本來正加緊外購劇網上播出前要預審，港視咁敏感，畀唔畀騰訊視頻去買係極大問題，估計有很大機會唔批。
我心諗咁今日睇咗港視通告買咗股，最後單嘢香咗點算？股民真係要執生。中環茶友分析港視話，佢搞咗免費電視牌照申咁耐，日日都要燒銀紙，股價早應該跌到無命，但佢仍然守係3元樓上咁耐，證明街貨好疏，主要揸股者都唔係咁簡單，家有消息發揮，股價爆上唔奇，但跟炒者最緊要識走位，有錢賺有理無理食咗胡先，高追千祈咪制。
集資多 買好股唔使急
國企集資陸續有來。華能(902) 公佈，按每股8.6元，配售3.65億股H股，集資31.39億元，比前收市價折讓8%。是次集資淨額30.94億元，用作補充流動資金。消息公佈後華能股價開市即刻碌低4.9%，收造8.92元，跌幅是國企指數成份股中最大。雖然守住配股價，但近期入咗貨嘅股民難免無癮。
正如陸羽仁講，近排買強勢股小心會撞正集資，點解會咁講呢？主要係投資市場天氣慢慢變咗。美國完成退市唔再買債，跟住中期國會選舉，執政民主黨痛失兩院議席(呢樣嘢先前預咗啲)，表面睇親商界的共和黨掌兩院，令營商前景更明朗，有利投資和股市。但亦有茶友提醒，一般感覺共和黨對利率政策係略為偏向鷹派，加上家唔係共和黨人做總統，佢哋大有理由暗中施壓叫加息，等到經濟呆啲，方便佢哋爭下任總統個位。
雖然歐、日爭相泵水，但係美國始終係全球金融大佬，同中國互動又最頻密，美國銀根轉向收緊，內地自然密切關注。好多資本密集嘅公司，都會趁息口未上前，盡量減低負債，金融、基建、公用呢啲都係息口敏感股份，如果公司負債有番咁上下，又或者股票價錢造得唔錯，管理層自然會諗發股集資。若然公司係批股，對股價即時影響無咁大，萬一係供股，咁小股東隨時帳面輸錢兼要掏腰包支持供股計劃。早前幾間國企金融股抽水，可以話係一葉知秋。
基建股食正大氣候
喺大氣候變化下，股民要執生，呢個環境唔係話無投資機會，但就要戒急用忍，特別係一啲受追捧嘅績優股，如果市盈率有番咁上下，股價又異常硬淨，咁就有機會伸手，股民最好耐心等候，等佢抽水之時先出手，咁就有機會平價買到好股票囉！
講番大市，人行繼續收水，再次正回購200億元人民幣，上證指數考驗2400大關支持後回升，港股先高後低，恒生指數收報23649，跌46點。
內地全力推動海上絲路，有人仲叫做「中國版馬歇爾計劃」，由於中國出錢出力，基建股續有運行。中交建(1800) 先跌後升，跑贏一眾國企指數成份股，A股升停板，H股收報6.7元，升3%；中鐵建(1186) 、中鐵(390) 都升逾2%。另外核電設備股都受追捧。哈爾濱電氣(1133) 抽升7%，東方電氣(1072) 飆咗9%，證明炒國策係近期短線最易跟嘅主題。
陸羽仁
金融High Tea 舊文
