中環在線：萬達掛牌 暗角撐老竇仍搶鏡
王健林獨子狂被集郵
■王思聰噚日不停被集郵，雖然一路冇Say No，但張張相都好鬼Cool。
大連萬達商業地產（3699）噚日掛牌，中國前首富王健林作為大股東當然係傳媒追訪對象，但要講受女人歡迎嘅程度，肯定唔及佢26歲嘅獨子王思聰。呢位被稱為中國最有米嘅富二代，噚日現身交易大堂，全程匿埋一角，不過都被多名眼利嘅女人發現，紛紛埋去集郵。
■王健林話自己 王思聰噚日佢冇帶新女友出現，亦冇高調咁傍實爸爸側面，喺大約半粒鐘嘅上市儀式，佢都只係企係角落頭，冇搶風頭。但呢位富二代魅力沒法擋，吸引場內唔少女人走埋去要求合照，不停被集郵。唔知係咪慣曬呢？佢一路冇Say No，不過無論佢同邊位影相，都係冇乜表情，Cool爆！
■王思聰粉絲嘅微博，儀式幾個鐘頭後有相。 互聯網 被人瘋狂集郵都不特止，原來有粉絲喺微博幫王思聰開咗個「王思聰新聞直播間一號演播大廳」，佢出席上市儀式嘅相，喺個幾鐘頭內就俾粉絲上載曬。仲有大量佢出席其他活動嘅相，任睇唔嬲。呢位粉絲仲喺微博幫埋萬達做宣傳，認真唔話得。睇嚟王思聰就算名草有主，仍然有好多女士對佢有興趣喎。
■王健林太太林寧（中）以淺色外套襯絲巾，高貴大方唔浮誇。 黃翹恩攝 太太簡約現身冇土豪味
寶貝仔撐場之餘，又點少得王健林嘅太太林寧呢。呢位闊太噚日嘅打扮一啲都唔浮誇，亦冇土豪味，簡單以一身淺色外套襯絲巾現身，斯文大方，唔講都唔知佢係主人家。當王健林應付傳媒提問嗰陣，佢就喺台上同其他嘉賓影合照，笑到鬼咁開心。至於王健林，提到佢未能重奪首富，佢就話自己連𠵱家係第幾富都唔知喎，表面上好唔志在首富名銜囉。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
