魚樂無窮：平安夜送上聖誕禮物
■中廣核是本港唯一上市的純核電股。圖為集團主席張善明。 資料圖片
是日平安夜半日市，希望大家都平平安安。年中寫過一篇文章，形容市況為「發達唔易搵食更艱難」，六合彩唔見我中，呢樣就開口中。往後股市有幾難玩，相信大家有目共睹，下半年升得最喪嘅只有殼股，以及往後嘅中資金融股，唔係人人敢買；年初做大贏家嘅新經濟股，年尾全線仆直，buy and hold信徒隨時嘔突。
玩外幣咩？美元獨大，除非你沽空非美，否則又係輸到七彩，散戶最愛嘅人仔，今年埋單都要見紅，人仔定存同國債，難免賺息蝕價。最可怕係，美元強港元強，資產價格理應下跌，但大家最唔敢或者冇能力掂嘅磚頭繼續炒爆，今年CCL累升超過一成，全城瘋狂搶上車盤，400萬樓下叫做抵買，劏房奇則成行成市，無殼蝸牛炒股輸錢，人生最痛苦莫過於此。
聽到呢度，相信大家都會好擔心，今年已經係咁，出年咪____（自己填）？唔使驚，希望在明年。點解？下個星期埋齋專欄話你知。
中廣核（1816）乃本港上市唯一純核電股，兼屬內地行業龍頭，市佔率達64%，月初上市後迅即升呢做多隻指數成份股，股價亦極度硬淨，累升26%，完美跑贏同期新股。內地積極提高核電產能，兼有稅惠措施，中廣核食到應一應，喺大小散戶支持下，中線可見4元，都算係一份唔錯嘅聖誕禮物！
唐牛
https://www.facebook.com/tongcow88
唐牛
魚樂無窮 - 唐牛 舊文
