假前食胡
2014年12月24日
內地股市周初雖然再升，但有三百幾隻股份下跌，俾人不良感覺，昨日終於有調整，指數由開市奄奄悶悶，變成掉頭向下，滬市出現調整，收市前跌勢更擴大，曾急挫逾3%，全日跌近百點，港股跌幾十點已經算少。今日港股聖誕前半日市，相信好多有錢賺的投資者，會考慮食吓胡，開開心心去消費。
油股彈完再軟
喺內地股市碌低下，港股算係有支持，恒指收報23333點，跌74點；國企指數收報11677點，跌66點，成交額顯著回落至780億元。由於內地股市呢輪調整比較急，加上聖誕港股無市，內地就繼續炒，比較被動，若然個市唔係大插，假前都休息吓好過再博。
由於人行繼續暫停正回購(即係收水)，令市場預期的逆回購(放水)落空，內銀股都普遍跌。惟農行(1288) 報3.83元，上揚0.03元或0.8%。另外，沙特阿拉伯強調石油輸出國組織(OPEC)不會減產，紐約期油急挫逾3%，一如陸羽仁預期石油股無咁快好得，幾隻龍頭石油股都向下，中海油(883) 跌1.5%。
能源價格大跌影響俄國，整出個俄國金融風暴，中國外交部部長王毅及商務部部長高虎城，日前就表示中國會力所能及向俄羅斯提供幫助。對於呢個講法，中石油(857) 高層對內地媒體話，讓中國挺俄羅斯油價不現實，而且也不可能實現。
《21世紀經濟報道》引述中石油高層說法，好坦白咁話中國不可能直接支持俄羅斯油價回升，但可以在其他方面展開合作，包括俄方考慮允許中國油氣公司進入當地上游油氣開採領域。該人士又指，中國需要的是穩定的油價，中國不願見到油價過高或過低。
呢位中石油高層講法同王毅的說法表面有異，內裏並無矛盾。喺國際石油市場，中國唔係首要角色，大導演始終係美國，內地根本無能力阻止油價下跌，咁樣做未必符合中國作為用油國的利益，但中國要透過合作支援俄羅斯，就唔係無空間。從呢個角度講，即係話內地都唔覺得油價可以咁快回升囉。
內房巨企萬達商業(3699) 首日掛牌，開市報48元，與招股價一樣，之後最高曾造48.2元，呢個已經係最佳走貨機會，其後股價開始潛水，全日低見43.8元，收市報46.75元，比招股價低2.6%，每手100股，不計手續費蝕125元。
萬達公開發售超額認購4.32倍，以接近上限定價，集資淨額280億元，成為本港今年集資王。佢係市值最大的內房股之一，相信好快會納入指數，但因為公開認購倍數唔多，基金可能都入夠貨，未來表現多少要睇大股東王健林嘅其他投資後着益唔益到萬達。
我自己唔喜歡上市潛水的股票，萬達咁大集資額近上限定價都要潛水，若有貨都係定位止蝕好啲。
佳兆業插水 博大霧要睇定
內房近期個個都趕年尾追數，佳兆業(1638) 位於深圳的14個項目，涉及業權及土地使用權爭議，被限制轉讓及抵押。佳兆業遭德銀降級兼削價，股價再出現跳崖式下跌，收報1.53元，大跌13%。
德銀將公司評級由「買入」降至「中性」，目標價由4.68元，大劈至2元。
今次限售事件，令人關注公司面對的政治風險，現時股價已經跌至遠低於4.5元的帳面資產值，股息收益率去到接近10厘，但呢啲可以話係買民企的風險。過去呢類公司有兩個結果，一個係成隻散晒，股東喊都無謂；一個係大股東賣盤俾人，若然係咁低位撈貨者就有機會執到筍嘢。由於現時單嘢仲係發展緊，政治風險未見底，加上好多內房股都唔係貴，想博大霧的股民，似乎唔使咁快出手，可以睇多陣先。
陸羽仁
金融High Tea 舊文
