智取大市：難賺大錢的四個原因
今年環球金融市場，其實商機處處，年初有科網股熱潮炒到尾段，年中又炒大折讓H股，年尾有內地金融股，又有A股狂升，首三季細價股亦炒到癲。滙市方面，日圓勁跌，俄羅斯盧布第四季食瀉藥，識得沽一定沽佢哋。機會好似好多，晉佳身邊甚少人滿意自己今年投資表現，而晉佳自家投資組合喺今年嘅回報率，亦係近三年最低。點解咁多嘢炒，都賺得唔多？晉佳趁年尾檢討，列四大難賺錢原因。
（1）塘水滾塘魚，資金只追逐小部份股份。
今年初炒科網股、彩票股之際，其他傳統股份一律冇運行，藍籌內銀股、本地地產股都要輸一成左右，如果閣下嫌科網股貴，嫌彩票股冇基本因素，年初注定食殼種，仲要分分鐘輸錢過上半年。
（2）中國模式多過基本因素模式。
今年首三季，內地金融股係買完講出嚟俾人笑得大大聲嘅板塊，突然之間，去到第四季，你唔買內地金融股就俾人笑番轉頭。首三季唔升嘅原因係乜？坊間解釋係壞賬風險高，估值平都冇用。咁第四季上升理由又係乜？原來係估值平，壞賬風險即刻當冇發生過。呢啲所謂中國模式，就即係冇模式，模式同病菌一樣可以變種，仲可以突變，究竟炒股可以點樣應付呢啲突變，請閣下自己參透。
（3）長線投資者墳墓。
全年有把股升得勁，但係冇一個板塊由年頭升到年尾，長線投資只限持有三至四個月，就一定要食糊，否則錯失高位獲利機會，科網股、大折讓H股已屬典型例子，手遊股IGG（8002）年頭唔夠十個交易日爆升接近一倍，但到而家股價由高位蒸發咗四分之三；大折讓H股浙江世寶（1057）由4月滬港通消息到11月17日滬港通開通日，股價爆升3倍以上，高位到而家唔夠兩個月，已經跌接近五成。如果閣下習慣持有股票超過一年，相信手上大部份股份今年都冇乜升幅，甚至要輸。
（4）個股唔跟恒指變動。
以前恒指升，非指數股份會跟升，恒指跌，非指數股份就跟跌，而家就算大跌市亦有強勢股升，大升市亦有大把弱勢股跌，冇咗一個有效嘅benchmark，唔少投資者失去方向感。如果閣下睇準恒指下跌，按兵不動，唔好意思，你註定錯失機會，投資組合價值原封不動。
難賺錢原因數之不盡。不過，原因唔係為自己嘅不足做掩飾，唔係將自己做得唔好嘅地方去合理化，而係檢討自己錯失，令自己更能夠適應炒股新模式，下一期，晉佳再講嚇改善投資回報嘅方法。
晉佳
http://www.facebook.com/pages/晉佳/719009541518415
本欄逢周三刊登
晉佳
智取大市 - 晉佳 舊文
