俄羅斯風暴
2014年12月17日
股市跌開有條路，特別係落後市，你走得慢、人走得快，當人哋調整，但你又跟跌，咁就好無癮，呢個就係港股嘅情況嘞。港股喺早排的升市中蝸步慢行，家遇上美股調整，於是又回番落兩萬三千點樓下。有中環茶友話，投資者損手已經無癮，你呢排仲成日叫人股燦，係咪太過贈興呢？我答佢話無辦法啦，鬼叫香港呢排咁運滯，搞到我哋炒股成日食水尾咩，好似昨日美股喺聯儲局開會前再跌，港股一開就插，仲喺低位收市，咁嘅情況想唔認低威都唔得啦。
盧布仆直有路可捉
美股隔晚大跌，主要係俄羅斯盧布急跌，臨急臨忙大幅加息，連埋油價再挫，搞到商品市場風高浪急。家俄羅斯好明顯係金融風暴格局，差在個風會唔會席捲其他市場。
俄羅斯爆發金融風暴，幾乎是預期之內嘅劇情。陸羽仁扮吓最識搞風搞雨、成日做風暴預言家嘅大鱷索羅斯拆吓局，俄國盧布近排仆到直，皆因政治經濟均對佢不利。
首先，西方圍堵俄羅斯，搞到佢隔籬鄰居烏克蘭想脫俄入歐，結果普京發惡，先發制人入侵克里米亞，令美歐政治吃完悶棍仲無晒面，因此大力發動報復制裁，令到俄國貿易大受干擾，國際收支帳好唔靚仔。為了打擊俄羅斯，美國同中東國家樂見油價急跌，令依賴能源收入的克里姆林宮大為頭痛。喺呢度不妨講多一樣，就係彭博出咗個報道，話美國油企決定同油組企硬，咁即係話低油價呢場價格戰會繼續打落去，點解美國政府會容許民間企業同佢中東條?打大交，相信都同地緣政治背後考慮密不可分！
除了政治同油價因素，另一個原因係熱錢流向。美國復甦勢頭日趨明顯，特別係勞動市場有不俗改善，能源價格大跌等於再送多一程，對耗油經濟如美國大為有利，熱錢開始由新興市場流出，俄國成為走資地區之一。資金流出初期唔係咁覺，慢慢走吓走吓，最後係壓倒咗強壯嘅駱駝。
如果從風暴形成條件去睇，呢次俄國爆發危機唔係咁簡單，同時係難以避免。至於風暴威脅有幾大，我估俄國都會幾傷，但對於全球金融市場，相信震盪未必好大。從過去經驗睇，俄國每隔一段時間就有類似的貨幣危機，呢個亦都係商品經濟收入不夠多元化的問題。
過去俄國爆煲，對全球最大影響係九十年代果一次，當時主要係由於對沖基金長期資本沽日圓買俄債大玩息差，結果盧布貶值一鋪清袋，震動埋華爾街，最後當時的聯儲局主席格林斯潘即係大幅減息，三兩吓手勢就搞番定。
騰訊轉弱想撈宜睇定
從過去經驗，新興經濟爆發金融風暴，通常會對發達地區股市有即時衝擊，但跟住好快就無事，甚至可能令資金回流尋求安全港；而美歐央行通常對這些國家出事，除非係見到會波及自己，否則態度係見死不救。按照舊日的足跡，呢次俄國出事，唔應該對全球股市有太大威脅。如果無新的突發因素，個市回一回之後可能就可以企穩番。
喺內地經濟數據弱，加上油價急跌觸發投資者擔心環球經濟有通縮危機下，雖然內地A股硬淨，港股都無運行。恒生指數收報22670點，跌357點；國企指數收報11136點，跌75點，成交上番912億元。
講起跌市藍籌普遍向下，要留意係騰訊(700) 股價失守110元關。騰訊主要股東馬化騰減持後，隻股就一直弱弱哋，要留意主席減持會唔會餵飽咗想買貨的基金呢？加上基金炒股年年有主題，科網今年由頭威到尾，出年仲會唔會係咁呢？想低撈的股民行動前最好諗諗呢兩個問題先。
陸羽仁
金融High Tea 舊文
