一周三件：金天有力發盈喜
■金天係東北地區龍頭，繼而拍住阿里攻入電貿市場。圖為公司主席金東濤。 資料圖片
金天醫藥（2211）有半年靚仔業績打底，嚟緊派發全年成績單，應該有得博盈喜。又集團係東北地區龍頭，呢期兼拍住大孖沙阿里健康（241），拓醫藥電商市場，嚟緊日子，掂過碌蔗。
據藥監局南方醫藥經濟研究所預測，今年祖國藥品終端市場，會增加13%，到1.4萬億元（人仔．下同）。金天係祖國東北地區最大醫藥零售連鎖店同分銷商，有經營網絡同規模優勢，已經可以分到一杯羮。
夥阿里拓醫藥電貿
金天呢期公佈，同阿里巴巴旗下阿里健康訂立戰略合作，加入由阿里健康喺東北地區推出既電子平台；而金天亦會成為阿里健康喺該區平台嘅合作連鎖藥店。
據行內預測統計，上年醫藥電貿規模68億元，但若果處方藥可以係喺網站平台開通，今年交易規模，可以飊升近兩倍，到200億元。按美國經驗，藥品網購佔總零售額30%。市場亦推斷，祖國藥品電貿市場，係可以上到4,000億至5,000億元規模。
金天喺傳統網絡上，實實淨係地區龍頭，夾住呢個優勢，再拍住大孖沙，踩埋落電貿市場。再講，呢瓣業務前景勁厚，金天煲得掂，身價肯定唔係家陣區區50億港元市值。
咪扯咁遠，金天舊年上半年盈利，幾乎翻半番到2.2億元，相當靚仔。場內專業預測，金天上年全年盈利增長35%到4.7億元，又就算全面反映2013年上市招股全面攤薄嘅不利因素，預測PE跌到落9倍。
場內國藥（1099）20倍、上海醫藥（2607）16倍，同仁堂（8138）29倍，金天平咗大大截。現價2.71港元買金天，當翻半番到4蚊計，PE先得14倍，未有耐追到行家。
錢雋
細價股專家
本欄逢周二、三、五刊出
錢雋
一周三件 - 錢雋 舊文
